K.P.
Martes de la semanada pasada fuimos kon mi marido al hospital Orahaim de Balat para asistir al meldado anual de Nesim Benbanaste (ke su alma repoze en paz i su nombre seya syempre pronunsyado kon fervor i respekto).....la kalor era fuerte, kaji sufokante ... el sol de medyo dia sin piadad ...el ayre empapushado de umidita kaji irrespiravle...las novelas del dia mas ke negativas ...los akontesimyentos trajikos de Londra ( i unos kuantos dias mas tadrede Charm el Cheik)...la amenaza de terrorizmo sovre los payizes evropeos ...el marazmo ekonomiko de mas a mas eskuro ...nada no predispozava al optimizmo...Portanto aya, en esta guerta byen mirada yena de flores i de arvoles, al bodre de este braso de la mar Marmara tan yeno de remembransas historikas, el resivo kalorozo de las benevolas, la kara sonriente de los medikos ...sinti profondamente ke (Loores al Dyo) ay ainda lugares ke se plasan ahuera del aktual konteksto dramatiko del mundo.
Lugar ande los ke sufren tyenen ainda la posivilidad de resivir un akolyo amigavle, ande eyos no son solo un numero o un kavzo de invistigasyon, ma una entidad humana ke tyene menester de kontakto i de kudyo humano.
En un lugar de la guerta, serka del edifisyo sentral, la estatua kreada por Nadia Arditti ke tuve la okazyon de ver por la primera vez...
Komo me ago un dever de syempre repetar, no tengo personalmente ninguna kompetensya para djuzgar de la valor profesyonal de una semejante ovra artistika i no tengo puede ser el derecho de formular ningun komento a este sujeto. Ma ay ovras ke me avlan, ke me dizen una koza, i es lo ke yo sinti en este primer kontakto kon la eskultura de Nadia Arditti, la kuala me plaso immedyatamente delantre lo ke es la fuersa de la unyon umana.
Dos puerpos sovre un tronko uniko, una mujer i un ombre fuertemente abrasados, apegados el uno al otro en un maraviyozo envolvimyento de amor i kerensya, i al nivel de las pyernas ninyos ke paresen surjir de este abraso ...
El simbolo es fuerte yeno de sinyifikasyon ... la konkretizasyon de una posivilidad de esperansa ke se puede topar solo en la fuersa reparatrisa del amor...
Para mi ke so profana en arte plastiko, kuando la ekspresyon estetika se adjunta a la verdad filozofika, la ovra ayega a su estado de plenitud el mas absoluto...
Todas mi felisitasyones a la artista.
A la baza del bloko eskultado, dos tabelas ke konfirman la kontribusyon bindicha de dos grandes filantropos Ida Kohen (z.l.) i Raphael Torel.
Konosi muy poko İda Kohen, ma Rafael Torel es un amigo por el kual mi marido i yo resintimos la mas grande estima i la mas grande admirasyon.
De una parte un mundo en rebuelta...de la otra una muy sinyifikativa ovra artistika i un akto de byenfezensya admiravle komo doz luzes en la oskuridad.
