Dos evenementos partikularmente sinyifikativos en el espasyo de una mizma semana

Klara PERAHYA
Dos evenementos kreados por dos grandes vizyonaryos, diferentes el uno del otro en sus personalidad komo en sus karakter... El uno grande Prelato  estriktamente atado a la boz de su konsensya i a las preskripsyones de su Fey... el otro luchador kon, sovre la espalda, la karga del destino de  un puevlo...
Dos ombres (konsyentes de la enorme responsavilidad ke repoza sovre eyos) kumplieron, kada uno de su parte, un mizmo paso verso la solaridad i la Paz,  difisil para el uno,  muy dolorozo para el otro
Gerreyar kontra un enemigo, kuala ke sea su fuersa, es sin dubyo un akto de grande difikultad, ma molestar sus propyos ijos es puede ser la mas grande sufriensa ke es dada a un "ser humano"... Esto, Sharon lo izo de una manera fuerte ma tambyen  kon una enorme tristesa.
Si (al presyo de ser personalmente deskreditado a los ojos de una parte de su propya populasyon)el aksepto de kumplir este paso, es solo afin de salvar el avenir de su payis i de obtener una paz verdadera  ke asegurera la perenidad de Israel, a la vez fuerte i flako, alavado i menospresyado.
El mundo konosia una sola facha de su personalidad, la del "Shefe Militar" pronto a todo afin de sovreguadrar la egzistensya de su payiz...agora konose la facha del ombre ke (malgrado  una aparensya  infleksivle)  tyene lagrimas en los ojos delantre la dezolasyon de sus sitizanos.
La semana pasada todos teniyamos un anyudo en el garon delantre los ombres, mujeres i  kriaturas ke se enganchavan a las reshas de sus ventanas o ke se azian keriya por un pasado pedrido por syempre ...Mizmo los myembros de la armada kargados de azer vazyar las kolonias yoraron endjuntos kon los ke rezistyeron asta el ultimo punto...
Ke va ser la reaksyon del puevlo Israelyano? Ke va ser sovre todo la repuesta del puevlo palestinyano? Es kel nivel de prestijyo de Sharon va suvir o abashar? Las kestyones se estan sigiendo kon grande prisa en el meoyo de kada uno. Es ainda muy temprano para avansar una kualkyer idea, ma todos savemos kel faktor el mas danjerozo, el mas de espantar, es por seguro el fanatizmo, de ke parte ke sea.... i es kontra el ke devemos sovre todo luchar.
"Devemos unirmos para kombatir el antisemitizmo i el rasizmo, devemos  respektar la santedad de la vida humana". Estas palavras fueron pronunsyadas por el Papa Benediktus XVI, durante su prezensya muy sinyifikativa en el Kaal de Kolonya, vyeja sinagoga destruida i kemada por los nazis en 1938 i restorada despues de la gerra, ke el Prelato (de orijen Jermanika) vijito durante su primer viaje en Almanya, en tanto ke Shefe de la Eglisya Katolika.
El Gran Rabbino Netanel Teltelbaum ansi ke los tres prezidentes de la Komunidad Judia de Kolonya lo resivyeron a la entrada de la Sinagoga, delantre el "memoryal" dedikado a las viktimas de la Shoah i el Papa oyo kon emosyon el Kadish ke fue disho a la memorya de los ke muryeron en los kampos de la muerte.
Sus primeras palavras fueron "Shalom Alehem"....
Aryento de la Kehila, djesto simboliko, los responsavles de la komunidad djudia ofresyeron un Shofar al grande Prelato i el en retorno ofresyo a la Kehila una Biblia. 
El kapo espiritual de la Kolektividad Judia empeso  su diskorso en referandose a las "Leyes de Noah" ke tyenen una valor universal i  ke se adresan no solo a los Judyos ma a todos los ombres de la tyerra, de ke kreensa ke sean...
El  Papa Benedikto XVI, el, avlo del Dekalogo, el kual aunke espesifikamente Judyo konstitue la baza de todo modo de sivilizasyon, i en este eskopo yamo a una kolavorasyon entre Kristyanos i Judyos.
El avlo de las raizes judias del kristyanizmo i  disho ke de toda su fuersa luchara kontra el antisemitismo...
Judaizmo i kristyanizmo tyenen el mizmo patrimonyo i la mizma veluntad de paz. La palavra  del Dyo  no puede ser una palavra de aborresimyento ma de amor,  una palavra ke se adresa al humano.
Su diskorso fue komo una yamada adresada a la Humanidad entera, de syempre akseptar i respektar  la kreensa del otro, todo en kedando si mizmo, atado a su propya kreensa.