Viktor APALAÇİFarklı kültürden gelen iki insanın, İrlanda kökenli bir Amerikalı kadın ile göçmen olarak Londra`da yaşayan Beyrutlu bir Arabın yasak aşkını anlatan film, sınıf ayırımı, iletişimsizlik, sevginin tükenişi, vefasızlık, yalnızlık temaları üzerine özgün şeyler söylüyor. 11 Eylül sonras
Coya DELEVİ
Antes unos kuantos diyas, malgrado la kalor, pasi kon mis amigas, oras maraviyozas. Estuvimos ande una amiga, en Bebek, djusto en frente la mar. Fue un doblo plazer para mi. Estar kon mi grupo i en un panaroma semejante. Esto komo sintyendo los lektores dizyendo: "Ke mos entresa tu pasatyempo?" Muncha razon!, ma, a mi me dyo la idea de este artikolo o moabet, asegun preferash… İ esto es lo importante, naturalmente para mi…
Yo syempre pensi, en una vida byen ekilibrada las distraksyones son kaji indispensavle. Ma, no kale mesklar vakansas kon distraksyon, porke munchos azemos este yerro. La persona se puede divertir sin ovligadamente estar en vakansos. Una seans de sinema, teatro, una komida afuera solos o kon amigos, un konserto ets… son divertimyentos ke se pueden alkansar fasilmente. Seguro, enverano espesyalmente, en vakansas mas i mas en los establesimyentos yamados "Tatil köyü", ay modos i maneras de pasatyempos, para los ke se pueden ir…
Komo lo dishe, en una vida organizada, las distraksyones deven tener un grunde lugar. No me akodro ken disho esta palavra: "Seriya una kondisyon ideal de egzistensya, si se puede apartar al distrear, el mezmo tyempo ke se pasa a lavorar…". Seriya en verdad muy bueno, ma no syempre fasil a realizar. Al pareser ke se lavora mijor kuando el meoyo I el puerpo estan repozados…
Es evidente ke devemos aki konsiderar el byervo distraksyon en un senso mas ancho. Kero dezir, no solo en forma de pasatyempo o divertimyento. No se si egziste en J.Espanyol, un sinonimo del byervo fransez "Loisir", Lo ke kero dar a entender yo. Meldar, sintir muzika, okupasse de un hobby ets., son aktividades ke sin ser egzaktamente divertimyentos, dan plazer i repozan. Enfin, kreo ke el lektor ya me entendyo… Son okupasyones ke entran al domeno de "Loisir"…
Unos pensan ke para tomar plazer de un divertimyento, kale eskojerlo afuera de sus okupasyones abitualas. Para eyos distraksyon es sinonimo de "trokamyento". Es tambyen una oportunidad de embezarsen kozas muevas. Kada uno es libero de pensar asegun kere. Personalmente, no tengo dinguna idea sovre esto, dingun punto de vista.
Si una persona, mezmo si esta muy okupada, es ke deve organizarse para apartar tyempo al divertimyento? Mi repuesta es pozitiva. Penso ke se puede rushir en organizandose. Los ke dizen ke son syempre okupados, son simplemente mal organizados. Esto es mi punto de vista I ke no seya malentendida: No esto prelendyendo ke diya i noche va ser "Vur patlasın, çal oynasın!…". Seguro ke no. Ma de vez en kuando, reelmente ay menester de trokamyento.
Avlaremos i un poko de los chikos, ke mas de los grandes tyenen menester de distraksyon. Esto es mezmo una manera de instruirlos. Para eyos todo deve ser komo un djugo. Ansi es mas fasil de inkulkar nosyones, porke son influensados de kada deskuvyerta. Es fasil de azer sorprezas a las kriaturas, afilu en lavorando. Es importante de krear ermozos rekodros, syendo ke la chikez es lo ke mos seguie toda muestra egzistensya.
Napoléon disho "El avenir de una kriatura es syempre la ovra de su madre". Es djusto. Los rekodros de muestra chikez son muestro uniko trezoro inatakavle. De ande a ande vine? Empesi kon las distraksyones i me pedri en medyo de las kriyaturas… Lo mijor es de kortar aki, suetando a todos divertimyentos asegun sus dezeos i gustos.
