Se izo un uzo de fyestar kada anyo en las komunidades judias de diferente sivdades de la Evropa las valores del patrimonyo kultural ke mos desharon muestros ante pasados. Veni todos, biviremos endjuntos este dia maraviyozo dedikado a las tradisyones de muestras madres… En diferentes lugares imprenyados de los rekuerdos ainda bivos del pasado, numerozas aktividades vos asperan: Konsertos de muzika relijyoza, klasika, polifonika i folklorika…Ekspozisyones… Poemas…
Por la primera vez en la Historya de muestra Lingua Ansestral, kon el presyozo ayudo de:
La Bilgi Üniversitesi
El İnstituto Cervantes
i la Komunindad Judia de Estambol
una “Eskola de Enverano” fue kreada debasho la prezidensya de Prof.Tamar Alexander i Dr. Eliyezer Papo, responsavles del Departamento de Ladino de la Universida Ben Gurion de Bersheba, en kolavorasyon kon el « Sentro para la Investigasyon i el Desvelopamyento de la Kultura Sefaradi "de muestra sivdad, dirijido por Karen Gerşon-Şarhon.
La avyertura tomara lugar Shabat el 3 Septembre a las oras 20.30 , en el Oditoryum del Kampus de la Bilgi Üniversitesi –Dolapdere.
Diskorsos seran pronunsyados a esta okazyon, sigidos por un konserto de muzika folklorika egzekutido por el grupo "LOS PAŞAROS SEFARADİS".
Los korsos de ensensyansa asumidos por Eliyezer Papo empesaran Alhad i tendran lugar el 4,5,6,7,9,12,13 i 14 Septembre de las oras 9 asta las 13, en el Kampus mizmo de la Bilgi Üniversitesi – Dolapdere i son avyertos a todos los ke dezean anchear sus konosensya del Ladino.En este kavzo eyos son rogados de adresarsen a Karen Şarhon Tel. (0212)231,92,82.
Un grupo de 22 estudyantes de la Universidad Ben Gurion partisiparan a este ensenyamyento ke sera kontado komo una mitad de trimestro.
Martez el 13 Septembre el filmo "El Ultimo Sefaradi" realizado por Dr.Eliyezer Papo sera proyektado en el Instituto Cervantes.
