Se izo un uzo de fyestar kada anyo en las komunidades judias de diferente sivdades de la Evropa las valores del patrimonyo kultural ke mos desharon muestros ante pasados. Veni todos, biviremos endjuntos este dia maraviyozo dedikado a las tradisyones de muestras madres… En diferentes lugares imprenyados de los rekuerdos ainda bivos del pasado, numerozas aktividades vos asperan: Konsertos de muzika relijyoza, klasika, polifonika i folklorika…Ekspozisyones… Poemas…
Klara PERAHYA
En una interview echo por la revista" l’information Juive" kon el eskritor Jacques Attali, el eskritor Fransez disho lo sigiente "...
(traduksyon)
"Para los Judyos la provedad es intoleravle. Para los judyos lo ke es inakseptavle es kel Otro seya en un estado de grande mizerya".
En sus palavras, Attali se refero al diskorso pronunsyado por el Rey Salomon a la okazyon de la fundasyon del Bedamikdash: "Los Judyos no pueden ser orozos ke si los otros tambyen lo son".
Estas palavras me izyeron grande impresyon. La semana pasada, en la Televizyon las ultimas fotografias del desgrasyado fuego ke, (en el sentro mizmo de Paris), kosto la vida a 14 kriaturas i tres adultos afrikanos, Un immoble en un estado de terrivle dekrepitud, eskaleras de tavla medyas derokadas, paredes eskomersidas por la umidita...famiyas de ocho o dyez personas en una superfisia de 50 metros kuadrados...la mizerya, la suzyedad inevitavle, la promiskuidad ...i esto en una de las sivdades las mas luksyozas del mundo...
En los korasones la sufriensa difisilmente somportavle de aver pedrido ken un ijo, ken un ermano, ken un amigo muy kerido, en los ojos mesklada a la dolor una revolta irreprimivle... i kuatro kalejas mas leshos la riza byen natural de los ke biven sin reziko ni anksyedad... sin este espanto egzistensyal de la prekaridad permanente.
En Afrika miles i miles de ninyos mueren de mal nutrisyon o (por mankura de medikos i kuras) de hazinuras fasilmente kuravles...ombres en el apreto, sin echo ni provecho, un ayudo internasyonal insufizyente i ke no ayega ke raramente a su buto... las epidemias, la inaktividad, la apatia, un terreno propisyo a la haraganut i al visyo.
Una muy grande inegualidad ekonomika entre los puevlos komo entre los ombres es paridera de dezastres...La verasidad de esta predikasyon, la sentimos oy en dia, milenaryos despues ke eya fue pronunsyada.
En esta epoka ke es la muestra, ande el munde se auzo a bivir en la sola aktualidad del momento prezente, sin ningun kontakto kon su pasado ni ninguna vizyon por su avenir, la Umanidad en keryendo enrikeserse, se esta emprovesyendo en su potensyalidad afektiva... Kulturas estan desparesyendo en favor de valores pasajeras...famiyas se estan dezazyendo, kada uno de sus myembros indo a la bushkida de una utopia irrealizavle.
En su grande sagasidad, el Rey Salomon avia por seguro evaluado en mizmo tyempo ke la terrivle injustisya el enorme perikolo ke konstitue una semejante situasyon. Ay en syertos de muestros savyos de la Antikita (profetas, monarkos o predikadores) un potensyal de refleksyon ke va mas leshos ke la dimensyon relijyoza i ke tyene un kontenido sosyo-etiko...El dogma en este kavzo es remplasado por el umanizmo i la obedyensa syega por la refleksyon.
