Se izo un uzo de fyestar kada anyo en las komunidades judias de diferente sivdades de la Evropa las valores del patrimonyo kultural ke mos desharon muestros ante pasados. Veni todos, biviremos endjuntos este dia maraviyozo dedikado a las tradisyones de muestras madres… En diferentes lugares imprenyados de los rekuerdos ainda bivos del pasado, numerozas aktividades vos asperan: Konsertos de muzika relijyoza, klasika, polifonika i folklorika…Ekspozisyones… Poemas…
La Profesora Glorya Asher de la Tufts University, investigadera en los kampos de la literatura Almana i Judia , enamorada de la lingua de sus avuelos, mos mando un poema de una sobriedad ke konfirma la otentisidad de sus sentimyentos
Keryendo partajar muestro plazer kon muestros lektores, vo lo transmetemos debasho estas linyas:
SIN KADENAS
En la mar sto entrando,
Dertes estó deshando.
Leshos de mí ke kede
Todo ke no se puede
Reyevar! Ke agora
Vino djusto la ora
De bivir sin kadenas,
Sin límitos, sin penas!
Parte de la natura
M’izi, su kriatura.
Yévame, onda fuerte,
Ande está mi suerte!
Ayre, tú bien salado,
Siempre me stes al lado!
Kedes tú, sol briyante,
Kom’ un spesial amante!
I si no ayga otros,
Kualo me dásh vozotros.
