Pasado Seya

Esta konseja verdadera traji-komika, me la konto en Turko, la eroina eya mezma, ke es una amiga miya. Devo dar unas, doz eksplikasyones sovre eya: es una retratada profesora de Universita. Durante su karyera, ensenyo en diversas sivdades de Anatolia i tuvo inombravles elevos. Sintiremoz de su boka este pasaje i veremos lo ke le akontesyo.

Tresladado i relatado por Coya DELEVİ

Pasado Seya
“Una tadre de Primavera, tornando a la kaza de mi ermana, ande estava bivyendo yo, desde un syerto tyempo, vide un oto aserkarse de mi. Un ombre de 30ᆷ anyos me saludo kon respekto. Me enkanti, tanto ke miri al derredor. No vyendo dingunos djuzgi ke era a mi este saludo i respondi en meneando la kavesa.
Al momento de entrar al apartamento, vide al mansevo del oto aserkarse, en dizyendo "Hocam... no me konosites?". Puede ser si me diziya su nombre, me iva akodrar, akualo me disho yamarse Ibrahim i adjusto ke era uno de mis buenos elevos, i ke yo lo keriya bastante i le ayudava ets... Alora, yo, instinktivamente  "A .. tu sos İbrahim Gü....", el nombre de un buen elevo ansyano, ma sin portanto akodrarme su fizyonomia..
Lo enviti a bever un kafe, me konto un alay de kozas. Le servi el kafe i lo deshi por un momento. Me fui a mi kamareta  (djusto enfrente de ande estavamos asentados) para tomar una koza de mi chanta grande. No se komo alevanti la kavesa i lo vide al mansevo detras de mi, demandandome ekskuzas por aver vazyado el kafe. Yo sorprendida, deshi el portmone de mi mano i kayo aryento de la chanta avyerta, ke ansi se vido su kontenido.
En akeyo, vino bozes de la otra vanda del apartamento, ke reelmente es muy grande. A la demanda un poko sospechoza del mansevo, le respondi ke aviya lavorantes, azyendo reparasyon en el banyo i ke, sin dubyo estavan avlando kon mi ermana.
Le dishe de asentarse en el salon  i entri al mupak azerle el 2. kafe. Ma, no paso un segondo, vino i el al mupak i me disho ke iva ir a tomarla a su ijika i revenir entervalo de 30ᆼ puntos, en adjustando: "Le avli tanto a mi ija de vos, ke kero ke vos konoska i vos beze la mano".
Naturalmente, yo no vide dingun inkonvenyente, ma ize el impardonavle yerro de no akompanyarlo fin a la puerta. Paso unas, doz oras no ay ken venga. Myentres, me se izo menester una koza i entri a mi kamareta, i kedi en el portal komo entontesida. La grande chanta no estava en su lugar, desparesyo!....
Akel momento realizi ke el mansevo la tomo i fuyo.. Era la chanta miya de "deprem". Teniya aryento objektos de valor moral i materyal, un poko de djoyadura, bastante dinero efektivo i mezmo el pasaporto, otros dokumentos....
Pensi ke esto era la rekompensa de mi konfiensa i un amargo rekodro de mi karyera. Ma oy en diya tengo dubyos. Era este reelmente uno de mis ansyanos elevos o un dolandiridji, ke se aviya dokumentado sovre mi, echo este plano? Porke no me akodri su fizyonomia. İ lo mas terrivle, ke me podriya akonteser si en kavzo ke no aviya lavorantes en kaza? Porke este fakto por seguro ke lo espanto i lo izo fuir. Esto nunka no lo va saver, ma la koza ke se muy bien i ke nunka me va olvidar, es mi bovedad. Ken trae kon sus manos al ladron a su kaza, le koze mezmo kafe!!”
Keridos lektores, esto fue la aventura de mi amiga ke parese komo un senaryo de komedia, ma ke fasilmente podiya transformarse en trajedia...