Los evenementos ( kualos pozitivos o kualos negativos) se estan sigyendo, kada uno arrondjando el otro.. Bivimos en un mundo plural ande nada es definitivamente establesido, ande todo parese ser posivle
ande a kada momento todo deve ser pensado i re-pensado.
La semana pasada, akontesimyentos terrivles en kaji kada parte del mundo
la revolta de la natura kon su tyerra despedasada por los elementos, konsekuensa puede ser del orgolyo del ombre
Una sivdad kaji enteramente destruida en el payis el mas poderozo de la planeta .
En otro lugar, syenes de personas matadas por el solo espanto, a la sigida de una falsa novela
Una serie interminavle de aksidentes de aviyon, provokados por el deskudyo i la absensya kriminal de konsensya profesyonal
En la Evropa, en el payis ke kontribuo lo mas a la promulgasyon de la Deklarasyon de los Derechos del Ombre aktos de aborresimyento i de odyo
Martes de la semana koryente, en el sementeryo de Ulus, komemorasyon syempre doloroza del primer asalto kriminal al kual fue sometida muestra kolektividad.
Komo lo dishe la semana pasada "Ay 19 anyos, muestra komunidad tuvo un primer kontakto kon este terrivle monstre ke es el terrorizmo".A un syerto momento, aviamos pensado ke se tratava de un akto de inimistad izolado
ma munchos otros akontesimyentos mostraron kel monstre esta syempre prezente, asperando en un kanton eskuro
ke syempre mos devemos akodrar, primo por respekto enverso los ke muryeron unikamente por ser judyos
.i tambyen, para ke mas nunka se repete.
Portanto, malgrado la dolor i la amargura, malgrado la insertitud i el espanto, despues kada sufriensa, la vida mantyene sus prerogativas, eya rekovra sus derechos, fuertes, briyantes
I es puede ser esto la verdadera viktorya del umanizmo kontra el nihilizmo.
Ansi juevez pasado,en el eskopo de mijor konoser la sivdad ke fue una de las prisipales kunas del "Judeo-Espanyol" i de asistir tambyen a korsos de Ladino, 20 mansevos i mansevikas de 20 a 25 anyos de la Universidad Ben Gurion del Negev (avyertos a muevas relasyones sosyales i a muevas realizasyones) arrivaron de Israel, enkavesados por la Profesora Tamar Alexander yena de proyektos i su kolavorador Eliyezer Papo, simbolo de enerjia..
Vyernes despues del Arvid, grande pranso de noche de Shabat en la terrasa del Barin Yurt. Una meza esplendida, yena de platos aparejados por las damas de la Ovra "Matan Baseter", debasho el kudyo de Djeni Franko kreadora del "Sistema Katering absolutamente Kasher del Barin Yurt" i de Zelda Yanni prezidente aktual del komite de damas.
Entre los partisipantes,un grupo de mansevos de muestra sivdad yenos de entuzyasmo i syertos otros vijitadores entre los kualos un kople de amerikanos, la mujer de orijen Turka ma nasida i kresida en los Estados Unidos . En supito los ojos briyando de emosyon, la oyi echar un grito de alegria pishkado kon guevo i limon, el pishkado ke aparejava mi nona
.avia en este grito todo el eskarinyo por suz anyos de chikes i por seguro el rekuerdo de una avuela probavlemente defunda.
De mezmo entre los partisipantes, se topava el rektor de la Universidad Ben Gurion de Negev, el Prof. Jimmy Weinblatt, ke vino espesyalmente para asistir a la avyertura de esta Eskola de Enverano kreada por el Sentro Moshe Gaon, en kolavorasyon kon el İnstituto Cervantes i el Sentro para la Investigasyon i el Desvelopamyento de la Kultura Sefaradi" de muestra sivdad, kon el enorme ayudo de la "Bilgi Universitesi" ke les avyo sus puertas.
Shabat a la noche, syempre despues del Arvid : Seremonia de avyertura kon en la asistensya, el Sinyor Raimundo Ezquerra, Konsolo Jeneral de Espanya, syertos notavles de muestra Komunidad i nombrozos amigos.
La profesora Tamar Alexander empeso su avla en agradesyendo kalorozamente los dirijentes de la Bilgi Universitesi i partikularmente la vice Rektora Şule Kut por su grande kooperasyon en la realizasyon de este proyekto. A su torno, la grande Univesitarya respondyo, insistyendo sovre el plazer ke eya resyente a kontribuir a este ermozo evenemento kultural i adjusto: el Ladino aze parte de muestras avlas lokales, el es la lingua de syertos de muestros sitizanos.
En efekto, keridos lektores, el « Judeo-Espanyol » tomo su verdadera konsistensya en el Emperyo Otomano, fuertemente mesklado a palavras Ebreas i Turkas.
Fueron tambyen invitados a tomar la palavra: el Rektor de la Universidad Ben Gurion Prof. Jimmy Weinblatt, el Direktor del Instituto Cervantes Dr. Pablo Asuero, el vice Prezidente del Sentro Moshe Gaon Dr. Eliyezer Papo, ansi kel Prezidente de muestra komunidad Silvyo Ovadya.
I Karen Gershon, depues de pokas i ermozas palavras para manifestar su alegria de kolavorar kon el Sentro Moshe Gaon, i su gratitud enverso la Bilgi Universitesi mos dyo, endjuntos kon Izzet Bana, akompanyados por Yarkın Grup Ensemble ve Izi Eli un maraviyozo konserto de muzika sefaradi.
En el programa: por seguro las romansas ke mos plazen tanto, i tambyen muevas kreasyones muy interesantes, entre otras Mizmor le David, sublime kante relijyozo
la kontentes de la asistensya era tan grande ke malgrado la ora tardiva, los muzisyanos se sintyeron ovligados de darmos un bis.
Alhad el dia sigyente , komo lo anunsyimos la semana pasada, dia maraviyozo dedikado a la kultura Djudia
numerozas aktividades: Konsertos de muzika relijyoza, klasika, polifonika i folklorika
Ekspozisyones de fotografias
Poemas
.Projeksyon de un filmo... Kampyones del Gizado judyo en su varyedad
golorez, savores de al tyempo, de muestra chikez, de la kaza de muestro padre
En las kalejas ainda empapushadas de lo ke era la vida Judia, ombres i mujeres a la bushkida de impresyones i sensasyones pedridas
Ay tambyen un lugar para la esperansa en muestro mundo
Mos adjuntaremos todos , mujeres i ombres de todos los payizes, de todas las kreensas, para azer de esta esperansa una realidad.