Omenaje a la memorya de un ombre eksepsyonal

Munchos serraron los ojos sovre los masakros perpetrados entre 1940 i 1944, munchos achetaron de ver dezapareser el rekuerdo de mujeres, ombres i ninyos arrankados salvajemente a la vida por razones unikamente rasyales, sin ke los kulpavles sean djuzgados...
El kastigo aplikado sin sentimyento de vengansa, segun la ley de djustisya, ekspresa antes de todo la veluntad de mentener un estado de Derecho ande ninguno sera otorizado de oprimir el Otro,  ken ke sea este Otro, poderozo o flako, riko o prove, djudyo, budisto,  kristyano o muzulmano.
Aunke rekonosido komo kriminal , Eichmann tuvo su procheso i suz avokatos, el tuvo el derecho de defenderse.....
Simon Wiesenthal ‘el’ dediko todos los anyos de su vida a re-estableser el prinsipyo de Ekidad ..."kada uno pagara por su falta, ni el ijo por el padre, ni el padre por el ijo". 
Penso ke la mijor manera de azer konoser este personaje eksepsyonal es de traduzir syertos pasajes de los omenajes pronunsyados por los grandes de muestro tyempo:
Moshe Katsav (Prezidente del Estado de Israel) “Simom Wıesenthal fue el mas grande kombatyente de muestra epoka. El reprezentava la moralidad de la Umanidad, el reprezentava el mundo libre i  demokratiko. El dediko su vida a la lucha kontra el rasizmo, el antisemitizmo i el nazizmo i ansi  kontribuo a amijorear el mundo.”
El konsilyo Evropeo: “El fakto de aver persigido  mas de mil kriminales de gerra no sinyifika "la kuesta de una vengansa"ma "la kuesta de djustisya....”
Lech Walesa (vyejo Prezidente de la Polonya) ...... "Su muerte es una grande pedrita i aflaka la famiya de las personas onestas. El va kontinuar a djuzgar todo lo ke es defektuozo..ma del otro mundo..."
Jacques Chirac (Prezidente de la Republika Franseza): "Wiesenthal fue un kombatante inkansavle en favor de la Djustisya i del Derecho...Saludo el kamino klaro i avyerto ke fue el suyo, triumfando de todos  los entropyesos , persigyendo en kada lugar del mundo los kriminales nazis afin de remeterlos a la Djustisya...
La ardor de su engajamyento i la tenasidad de su kombate renforsaron ainda maz la vizyon del drama de la Shoa, i esto afin ke la Umanidad no se olvide i ke frague un futuro ke rendra imposivle una semejante desgrasya.”
Dominique de Villepin (kapo del Governo Fransez)  "Simon Wiesenthal konsakro su egzistensya a una ovra de Djustisya i de Memorya afin ke todos los kriminales nazis i sus kompliches respondan de sus aktos.
Aunke el mizmo fue viktima de los krimines nazis, Simon Wiezenthal pudo kumplir su misyon kon dinyita, sin aborresimyento ni esprito de vengansa.
Su aksyon deve kontinuar i es en inspirandose de su egzempyo kel governo fransez  luchara kontra el antisemitizmo en Fransya komo ahuera de Fransya".
Gerhard Schroeder (Kanchelyer Alman) “Saludo la Memorya de Simon Wiezenthal el kual se konsakro a la djustisya en esforsandose de dar a las viktimas de la Shoa una kara i una dinyita.
El kontribuo a dar a la Almanya, komo a todos los estados demokratikos, la konsensya de la nesesidad de asegurar kontinualmente los fundamyentos de la libertad , de la dinyidad umana, de la tolenransya i del respekto mutual”.
Simone Veil: (Prezidente de la Fundasyon para la memorya de la Shoa) "El prinsipyo segun el kual “kada uno es responsavle de sus aktos” inspiro Simon Wiesenthal komo deve inspirar kada uno de entre mozotros. El mijor omenaje ke puedemos pronunsyar en este momento es de persigir su kombate  en favor de la toleransya i su lucha kontra el rasizmo i el antisemitizmo.
La Fundasyon para la Memorya de la Shoa saluda el koraje i la konsensya moral ke karakterizaron syempre Simon Wiesenthal".
Nicolas Sarkozy (Ministro  del İnteryor Fransez) “El egzempyo de Simon Wiesenthal  mos deve pushar a luchar kontinualmente kontra todo modo de rasizmo i de intoleransya afin de azer turar muestras valores republikanas. Sin el inkansavle kombate de Wiesenthal, djustisya no puedia ser rendida a todos los ke fueron eksterminados por la barbaria nazi. Su personalidad marko muestra epoka. Su vida kedara syempre un egzempyo para todos los ke kreen ke puede egzistir una Djustisya.
François Bayrou (Prezidente del UDF- Fransya) “A penas de retorno de los kampos de la muerte ande el mizmo fue internado, Simon Wiesenthal deklaro la gerra "al Olvido", i en dedikando su vida a este kombate, el devino un simbolo de rezistensya. El es el ke permetyo ke mas nunka las konsensyas no puedan kedar syegas delantre la trajika istorya del  Nazizmo.
Este ombre remarkavle salvo la Umanidad de la mas grave de todas las kulpas “el” krimen de indiferensya”.
Ke su alma repoze en paz.