Klara PERAHYA“Kasador de kriminales de gerra” o “Konsensya de la Umanidad”, Simon Wiesenthal fue uno de lo primeros ke, malgrado el silensyo i la indiferensya de despues la segunda gerra mundyal, rendyo su dinyita a la memorya de los 6 milyones de judyos ke muryeron en los kampos nazis.Por interes politiko o puede ser simplemente ekonomiko, munchas altas İnstitusyones i munchos governos ke pretendian ser los defensores de la Djustisya, dyeron azilyo o perme
Coya DELEVİ
Kuantos mezes pasaron dezde ke eskrivi " La Primavera?" Komo se fueron? Estamos bivyendo la fin del enverano, el mez de Septembre. En Mayo, mos espertimos una demanyana kon un sielo klaro, un sol briyando. Un poko otro va ser la kontra: madrugadas freskas, ke mos van a dar estremesimyento ( titreme). Van a estar tambyen mas eskuras las demanyanadas…Puedemos suetar la byenvenida al otonyo….
La verdad, yo no puedo konsever ke esta sezon seya sinonimo de melankolia para unos.No kero egzajerar en empleando el byervo "tristeza".Un poko de ayre, un sielo eskuro I luvyozo no deven ser orijen de estos sentimyentos.Tambyen no deven trokar muestra umor.Prefero a la kontra pensar ke la sivdad se arrebive.Konsertos ,ekspozisyones I okazyonez de ver los amigos ets…
Estambol esta bivyendo el mez de Septembre I toda la prisa (telaş) del empesijo de una sezon I naturalmente de las eskolas..Esto se esta konstatando de munchas maneras. Antes de todo el trafiko.. Ya empesimos a oyir de mas en mas los klaksones ,sinyos de despasensya de los konduktores..Los kaminos serrados,muchedumbre asperando en los terminales I tambyen los otobuses kargados…Estas son las vizyones abitualas de muestra sivdad.
Poko a poko las vitrinas estan trokando de facha I de prodoktos. Estamos vyendo trokamyento en syertas vedruras. Ma no se puede dezir ke ay muncha diferensya. İnvyerno estamos topando kaji todos los legumbres de enverano, ke no esto sentyendo el menester de enumerar.
Otonyo kon sus ayres I sus luvyas..Las ojas amariyas o ruvyas bolando sovre los trotuares, mesajeros infayivles (şaşmaz) de la sezon. İ las luvyas…ke mos van apanyar en supeto. En vezes el sol va topar un pasaje entre las nuves, I un poko timido mos va amostrar su kara para alegrarmos un poko!. Miles de pasharos migrantes (göçmen kuşlar) ,se estan aparejando a abandonar la sivdad. El ritmo de la natura esta lavorando sin marearse, sin falta, komo una makina byen montada, una komputadera (bilgisayar ) byen programada.
Portanto Septembre no es la fin del enverano. En el sud (güney ) se esta bivyendo el enverano yeno, yeno.Es una grande oportunidad de vakansas para los ke no izyeron dayinda. Seguro si no tyenen dingun impedimyento (engel ) de lavoro urjente o de eskola…Es una sezon konsiderada komo muerta. De ests punto de vista, se puede azer vakansas mas ekonomikas I mas kalmas.
En Septembre ay un djenero de melankolia en syertas fizyonomias, en el aver.Kale pensar,ke komo todo, I estos son diyas pasajeros. Los arvoles de muevo van enfloreser, los pasharos van a tornar, la natura se va renovelar, I la Primavera otra una vez va dezir:: yo ya vine…Solo kale asperar.
Porke ay un chiko pasaje, bastante yelado, un poko mas eskuro, ma portanto en vezes blanko kon su karpeta de inyeve ,I seguro kon sus friyos I furtunas: el invyerno…No se dezea muncho salir, ay en vezes una haraganud I puede ser otras I otras kozas ke no kero afilu nombrar..ma todo pasajero. Lo mas derecho es de no egzajerar los problemas,de bushkar okazyones de kontentes, sin olvidar ke la Primavera esta detras de la puerta.Azed la prova komo mi I pensa ke el invyerno es la "antishambr" de la Primavera, I kale pasar por ayi para alkansar a los diyas ermozos. Solo un poko de pasensya….
Tambyen ,esta sezon, el mez de Tishri, tyene otras ermozuras, otras partikolaridades para mozotros Djudios. Es el mez de fyestas, de selebrasyones, el empesijo de una mueva anyada. A esta okazyon, a todos los amigos I keridos lektores : SHANA TOVA-HAG SAMEAH.
