Klara PERAHYA“Kasador de kriminales de gerra” o “Konsensya de la Umanidad”, Simon Wiesenthal fue uno de lo primeros ke, malgrado el silensyo i la indiferensya de despues la segunda gerra mundyal, rendyo su dinyita a la memorya de los 6 milyones de judyos ke muryeron en los kampos nazis.Por interes politiko o puede ser simplemente ekonomiko, munchas altas İnstitusyones i munchos governos ke pretendian ser los defensores de la Djustisya, dyeron azilyo o perme
Keridos korrelijionarios i ermanos
Komo todos ya lo savemos muy bien, “Rosh Ashana” sinyifika en nuestra relijion komo “Ayom Arat Olam Ayom Yaamid Bamişpat/Diya ke fue kriyado el universo i diya de estar en el djuzgo.” en este diya egzaminamos nuestra konsensya verso lo pasado i renovelamos nuestra moral todo en repetando nuestra desizyon de bivirla nuestra vida por el avenir konforme a los preseptos de la Tora nuestra santa ley.
Esto reprezente en mizmo tiempo la ‘Teshuva’ ke es el aripitimiento i nuestra veluntad de alesharmos de neustros defektos. İ ansi es ke meresemos la piadad del kriador. No ay dubyo ke la boz esmoviente del Shofar nos va animar i mos va dar la oportunidad de kompletar neustros doveres verso nuestro sinyor.
Keridos korrelijionarios
Mientres ke entramos a una aynada nueva kero partajar kon vosotros siertos de mi pensemientos i sentimientos.
Referandomos a el anyo pasado, esto bien kontente de remarkar ke ya estamos bien rekuperados kolektivamente visto ke nuestras sinagogas, enstitusiones i fondasiones estan fonksionando en un orden manyifiko i en siguridad kompleta. Esta situasion mos da a mano de partisipar mas numerozamente a las orasiones en nuestras sinagogas. Ma en todo kavzo no manko de aksentuar aki ke las mezuras ke estamos aplikando por la siguridad, mos esta kavzando depansas notavles en el budjeto komunal.
Keridos Ermanos
Tengo el orgulyo de ser el testigo okular del orden i del fonksionamiento mas ke bueno de nuestras sinagogas, enstitusiones i fondasiones donde me estan dando imensa konfiensa por el estado i el futuro de nuestra komunidad. Las apresiasiones i alavasyones ke sinti mientres ke vijiti kon mis amigos notavles ke vinyeron del ekstero los devemos a los dirijentes i a los bienhechores ke sostienen a estas.
Keridos korrelijionarios
No tengo ningun dubyo ke puderamos venser todo modo de difikultad tanto ke konservamos nuestra unidad i ermandad. Esto bien siguro ke tambien vozotros estash de mizmo avizo. La armonia komunal es bazada esansialamente a la buena veluntad i a el aserkamiento resolvadero. El akordo mutual nos arezyara nuestra unidad i ermandad.
El Rosh Ashana, es una buena oportunidad de desidar por lo bueno i de ponerlo en aksion.
Dentro estos pensamientos i sintimientos vos auguro ke la aynada nueva vos prezente sanedad i prosperidad kon todos vuestros keridos, i ke el Santo i Bendiço El mos aregale a nozotros i a todo el mundo pas i todo bueno. İ kon esto vos bendigo kon:
“Tizku Leshanim Rabot Neimot ve Tovot”
Şana Tova Umetuka
Rav İsak HALEVA
Gran Rabino
