El tyempo estava ermozo i muy kaynte. Sovre la gidansa de Albert a la entrada de la sivdad tornimos a la derecha i moz topimos en el simetaryo. Ke vemos dos otobuses de djente vinidos de todas las partes del mundo bushkando las trasas de las famiyas Behmuaras i Benaroya. Vinyeron del Brazil, Fransa, Israel etc. Del grande simiteryo lo ke kedo es una chika parte. Unos ombres povres i dezmazalados estan bivyendo aya. Enkantados de ver tanta djente ensupito. Meldimos los nombres i las datas eskritas sovre las tombas. Antes de salir meldaron un kadish.
Muestra destinasyon fue dospuez las kalejas ande moravan los Djudyos. En el empesijo del dalkavo siglo estiman ke moravan 28 mil almas. Oy endiya ay doz personas ke moran achakes del echo. En la kaleja topimos una kaza onde estava eskrito la data Djudiya 5672. Emosyonados de topar una trasa Djudiya chafteyimos a la puerta i demandimos permisyon para entrar. Los moradores marido i mujer de una sierta edad moz envitaron kalorozamente aryento. Mos kitimos los kalsados en el portal i egzaminimos la kaza. Eyos la merkaron atras 15 anyos. Moz amostraron una foto de famiya de un ombre de la famiya Çiprut ke naso en esta kaza i tres vezes vijito la kaza. Moz trataron chikolatas ke dicheron su ijo embiyo de la Almanya. Dedetras de la kaleja onde estavamos se topa el kal abandonado i la meyatad derokado. Albert i Soli se kazaron en este kal. Dezeyamos i esperamos ke las komunidades Djudiyas i el Mayor de Edirne meten mano en serka. En indo derecho del kal para abasho se topan los bodres del riyo Merich. Soli moz disho ke lo yamavan Maritza. Los Djudiyos se ivan en diya de Shabat a piye i se asentavan a bever chay i kafe en los bodres del riyo. Un viyejo ponte se topa entre las doz partes. Por la parte de enfrente se ivan la tadre a komer en los restoranes siempre en el bodre de la agua. La verdura se va fista aryento del riyo. Pahsaros blankos se asentan en grupos aryento de la agua. Una vista ke arepoza la alma. En avlando el sinyor Sabi moz demando la sinyifkasyon de syertos byervos ke oyo de sus paryentes sin saver ke era en Turko. "Çocuklar var, söylema." Problamente kuando los paryentes keriyan dizir sekretos ke los chikos no deviyan de oyir.Antes de tomar el kamino del retorno vijitimos la cami Selimiye. La istorya mo la konto Albert Eskenazi: El sultan keriya fraguar una cami en este lugar. El tereno aparteniya a un Djudyo ke kultivava flores. El no kijo dar su tereno. Todos le disheron, loko sos tu, el sultan lo kere. El sultan disho komo se va azer cami kale ke lo de de su propya veluntad. Dospuez de unos kuantos ir i vinir tomaron i fraguaron. Mimar Sinan el famozo architekto en rekuerdo de este ombre ke le izo difikultades en un lugar de la mishkita metyo una roza a la rovez.
