Ninet BİVASAlhad le 18 Septembre kon unos kuantos amigos moz huimos a Edirne. Entre eyos Albert i Soli Eskenazi una de las dalkavo famiyas ke salyeron de Edirne en 1991, i el sinyor Sabi Behar de Miami ke estava bushkando las trasas de su famiya. Su padre oy de 89 anyos teniya 2 anyos kuando se fue de Edirne kon su madre i ermanos; su padre aviya murido kuando teniya el 1 anyo, de dizanteriya en la primera gerra mondial. Dospuez un kamino de doz oras i mediya ayegimos a
ROSHASHANA - YOM KİPPUR - SHOFAR, tres byervos de los otonyos de mis syete ,ocho anyos.. Teniyan para mi una sola sinyifikasyon: fin del enverano i ir ala eskola. Doz, tres anyos despues, trokaron de sensyo para la ijika mas entendida .Fueron alora sinonimos de una fyesta inkomparavle, seguida de un diya interminavle (mil ekskuzas por este byervo) de taanit i de orasyon. Fue alora ke mi defunto nono(b*m),sintyo el menester de darme eksplikasyones i syertas nosyones ,portanto simples sovre estos diyas.
El resto, la vida i los anyos me lo embezaron. Dezde muncho tyempo ya se ke son tres byervos ke kada Djudio emplea en los diyas redutavles, un poko mas demaziya ke syempre.Dyez diyas YAMİM NORAİM, empesando en el primo de Tishri, en los kualos mos djuzgamos, investigamos muestro komporto durante el anyo. Tornamos verso D., eksprimyendo arrepintir, demandando pardon Diyas ke mos aparejan a YOM KİPPUR.
El mez de Tishri es mez de orasyon ,de pardon, ma es tambyen de fyestas i alegrias. En Roshashana, fyestamos la kriasyon del mundo. De este punto de vista, es diferente de las otras fyestas Djudias o diyas importantes, en los kualos selebramos un evenimiento istoriko en komemorasyon.
Es una tradisyon de komer dulse en la primera noche en ogurando una mueva anyada, kon paz, prosperidad i tomar lisyon de las faltas del pasado para pueder alkansar a mijor avenir. Roshashana es adjustar otro un anyo a la kavena de los anyos. Un anyo de alegrias, o de penas, de esforsos i rekompensas.
Es una mitzva ke mos ordena la TORA, de kantar el Shofar diya de Roshashana i de dezir :"Oy estamos selebrando la kriasyon del mundo" – HAYOM HARAT OLAM.". Roshashana es la unika fyesta relijyoza ke se selebra durante doz diyas tambyen en Israel.
10. Tishri, Yom Kippur, un diya importante de orasyon i taanit. Un diya de demandar pardon, de pagamyento de los pekados. Es el diya en el kual MOSHE RABBENU, RESİVYO el pardon del Kriador, para el puevlo Djudyo ke aviya pekado en adorando el bezerro de oro. Yom Kippur es el diya en el kual, Moshe Rabbenu abasho del Monte Sınay kon las segundas TABLAS DE LA LEY en sus brasos. Sinyo del pardon divino ke aviya dechidado de eksterminar este puevlo ke lo aviya enyegado.
La noche ke empesa el taanit,se melda el KAL NİDRE ,ande se demanda pardon por las djuras echas al nombre de D., i ke no fueron kumplidas. "Dinguna orasyon de Yom Kippur no mos alimpya de los pekados. Ma si ay un sinsero arrepentimyento, el Kriador va pardonar". La orasyon final de "NEİLA", es el atorgamyento de los pekados. El SHOFAR indika la fin del Taanit.
El Shofar, en los evenimyentos antiguos eskritos en la TORA, era uzado para indikar el Shabbat,la mueva luna o la konsakrasyon de un muevo rey. Oy, en Israel, se kanta el Shofar myentres la seremoniya de djura del Nassi.
SHANA TOVA - HAG SAMEAH - TİSKU LE SHANİM RABOT.
