La organizasyon Franseza (AIU) penso ke kale modernizar el stil primitivo de la edukasyon oriental del Imperyo Otomano, del Iran i de los Balkanes.
Al empesijo, afim de edukar los profesores de estas eskolas, el AIU fondyo la Eskola "Ecole Israélite Orientale" en Paris en el anyo 1867 i los buenos elevos de diferentes payizes fueron arrekojidos i mandados a Paris por estudyar en esta eskola.
Las eskolas AIU davan grande importansa a la lingua i kultura franseza, ma el ebreo, la Biblya, i los otros sujetos djudyos no eran tan estudyados.. Los elevos ke eskapavan estas eskolos saviyan el Fransez komo en las eskolas fransezas. Estas eskolas fueron las primeras ke dyeron una edukasyon evropea en Estanbol.
Munchos mansevos djudyos ke eskoparon la AIU fueron muy reushidos i se izyeron grandes Dirijantes de las komunitas djudiyas. Mas despues, las otras eskolas djudiyas ke se fondaron en estas komunitas fueron enfluensadas por el sistema edukasyonal de la AIU.
La edukasyon de la AIU era muy otoriter. Sin dar raporto al sentro de Paris, los direktores de estas eskolas no puediyan dar paso.
En el anyo 1868, la primera eskola AIU fue fondada en Estanbol, en Kuzguncuk.
Komo en estos anyos, no aviya una eskola djudiya para los ninyos provez de Hasköy, Balat i Kuzguncuk , los Grandes de la komunita de "Los Frankos" se konsintyeron ke los misyoneres Protestantes en estos kuartyeres, empesaron a okuparsen de eyos.
Alora eyos se adreseron a la AIU de Paris para ke los ayude en la edukasyon de estos ijikos i ijikas afin de protejar la manseves djudiya de la enfuensa de las eskolas misyonaryas. Los dirijontes de la komunita djudiya; Avram Kamondo, Izak i Salamon Fernandez, Emanuel Venezionu penaron muncho para ke se fonden las eskolas AIU en el Imperyo Otomano.
Kon el ayudo del Baron de Hirsh ke se topava en Estanbol en estos anyos i kon el ayudo materyal de un milyon de Frankos, munchas eskolas fueron fondadas en Estanbol; en Balat (1875), en Dağ hamam (1875), en Galata (1875),en Hasköy (1877),en Ortaköy (1881). Afuera de Estanbol en İzmir (1873), Edirne (1878), Çanakkale (1878), en Bursa i en Kırklareli.
En el anyo 1912, aviya 71 eskola de ijos i I 44 eskola de ijas en el Imperyo Otomano.
Aparte la edukasyon djudiya, esta organizasyon (AIU) se okupo para arrekojer los dokumentos de la kultura i del folklor en diferentes payizes; i formo una grande biblioteka i tambyen importantes archivos.
Las eskoles AIU djugaron un grande rolo en el desvelopamyento del puevlo djudyo en el Imperyo Otomano. El puevlo djudyo se aklaro i se izo mas aktivo en el komersyo i en los echos del governo en los anyos dalkavo del Imperyo.
Despues de la Segunda Gerra Mundyal, las eskolas AIU pyedreron en el mundo entero el kontakto kon el sentro de Paris i. una a una las eskolas AIU se serraron...
