LA EKSPULSYON

(1492 İ EL 16. SİGLO)
Coya DELEVİ

Kero empesar kon un kurto pasaje del livro del eskrivano Espanyol ,"Luıs  Suarez  Fernandez. Lo meldi tresladado en Fransez "LES  JUIFS  ESPAGNOLS  AU  MOYEN AGE " ( los Djudios Espanyoles en la epoka medyeval ).
"Una impresyon jeneral ke no puedo demostrar .me esta azyendo pensar ke la majorita de los Djudios eskojyeron el kamino duro del egzilo i manifestaron sus fidelidad a la fey de sus ansestros."
En los dokumentos ke meldi, ay diversas ipotezas  sovre las razones de la ekspulsyon. Para un amator es reelmente difisil de azer komentos ke pueden ser yerrados .Esto es echo de los espesyalistos. Ya es savido ke los Djudios teniyan un rolo importante en la vida sosyal, ekonomika i kultural de la Espanya. Una kampanya dura i sin piadad empeso kontra eyos, i tambyen kontra los "Konversos ". La ekspulsyon de numerozos  Djudios, provoko un importante "vaziyo" en los sovredichos domenos i otros. Es evidente ke la Inkizisyon, fue una institusyon ke enfortesyo la monarshia Espanyola.
(1*) " En el intervalo de kuatro mezes ,todos los ke no achetaron de konvertirsen al Kristyanismo abandonaron el pais. El shifro total es evaluado entre 150.000 _ 250.000  almas. Komo una koensidensya trajika, el termo fiksado por el  "Dekreto  d’Ekspulsyon" eskapo el mueve de Av "Tesha be Av "
Este epizodyo de la  historia Djudia, fue syempre pasyonante i tambyen instruktivo. La verdad es ke, asta unos doz anyos, lo ke konosiya i saviya sovre este sujeto era muy superfisyal. Kuando me rendi kuento de mi inyorensa, me sinti komo atirada. Yo no so istoryana ni tambyen  investigatora profesyonal. Portanto ay un syerto tyempo ke empesi a meldar livros, dokumentos de eskrivanos espesyalizados en este sujeto. Mis bushkidades son limitadas kon lo ke me embezo de estos livros.
Es muy natural en tal ke desendyentes de los egzilados de 1492, ke se instalaron en el Imperyo  Otomano, mos enteresimos   mas muncho a sus suerte, la suerte de muestros ansestros. Efektivamente kuando se trata de los Sefaradim, en jeneral, se avla solo de los ke fueron ekspulsados de la Espanya. Fue despues ke tuve la okazyon de meldar syertos lavoros, ke me rendi kuento ke yo personalmente no se muncho sovre la suerte de los ke fuyeron al Portugal. Una suerte no menos doloroza. Fue alora ke dechidi de oryentar mis bushkidades espesyalmente sovre los Djudios del  Portugal i a sus emigrasyones despues, a otros sielos.
 ( 2 * ) "…Djudios Espanyoles fuyeron versos otras tyerras… Ma, en 1492, fue una kaskada. Dezde el  13 Julyo, serka de  250.000  Djudios espanyol, se egzilaron verso el  Portugal, La Navarra, los paises de la oriya de la Mediterranea, espesyalmente el  İmperio  Otomano. .."
 ( 3 *)  " …Myentres de la ekspulsyon de los Djudios en 1492, una grande partida de los refujyados, ( mülteci) eskojyeron el kamino el mas fasil, i ayegaron al Portugal, ande fueron otorizados a instalarsen en pagando una suma.  Ma, unos kuantos anyos despues, ( 1496- 97) la politika real del Portugal  troko i se dechido a seguir el egzempyo de la  Espanya : impozar a los Djudios el bavtesmo (vaftiz) o el egzilo ..."
Efektivamente, el monarko  Manuel, seguiendo una politika de aserkamyento kon la Espanya, eskojyo el kamino de azer matrimonyos kon las prensesas espanyolas.  Ma, deviya achetar la kondisyon: ekspulsar los Djudios venidos de la  Espanya, en el tyempo del rey Joao II. i Manuel arrekojyo los Djudios en Lisbona, i los ovligo a trokar de relijyon.  Esto fue seguido de un grande masakro  en  1506. Kon tyempo adopto una politika de proteksyon i permetyo a una grande partida de djudios de emigrar a la  Hollanda. El ijo de Manuel pasando al trono, ( 1521 –57), kon matrimonyos mutuales, se aserko de la  Espanya, i permetyo a la Inkizisyon de instalarse en Portugal (1536 )

 (A  KONTİNUAR) COYA  DELEVİ.

( 1 *) ( 3 * ) CECIL  ROTH   Los  Muestros  No- 38
( 2 *) HAIM  VIDAL  SEPHIHA   Los  Muestros  No 20

P.S- Renkontri diversas kontradiksyones sovre el shifro total de los egzilados. Yo me referi solamente  a lo ke  meldi en diferentes  lavoros sovre el sujeto.   C.D.