Los pasharos asta oy simbolo de libertad

Dos kavzos diferentes
Dos preguntas sin repuesta
                           
Klara PERAHYA
Los pasharos asta oy "simbolo de libertad, simbolo opozado a la servitud i a la opresyon" , los pasharos  konkuistadores del espasyo avyerto, promotores de movimyento komo una negasyon grandioza de la inersia i de la muerte.... eyos ke personifikavan la ermozura, la grasya i la glorya de posedar las alturas ....los pasharos ayer objekto de admirasyon, oy de sospecho,de espanto i de odio.
El pasaje es tan kurto de la konfiensa al desfio, de la esperansa al dezespero ...de la sekuridad al perikolo.
Desde unos kuantos anyos, un destino implakavle parese persigir el mundo, asta kuando? deke? La tyerra, madre mantenedera del ombre parese traisar su ijo ...o puede ser es ke es el ke la traisyo? Kuala es la parte de responsavilidad umana? O byen ke es el rolo de una fatalidad syega ke empeso a  chaptear  la kaza del prove komo tambyen la kaza del riko?  
De mas a mas la mundyalizasyon esta abatyendo las frontyeras sin por esto rezolver todos  los problemas. Los ultimos dos siglos ambezaron munchas kozas al ombre ...la inkyetud, la mefiensa, el dubyo... De mas a mas el menester de "ayudo mutual"  se esta azyendo sentir, imperyozo, imperativo, uniko  remedyo de salvasyon.
La sufriensa, eya mizma  paridera  de injustisyas i de revoltas, esta asperando a  la puerta, terrivlemente fidel a su posto. Eske el mekanizmo de la solidaridad  va djugar enteramente, asta partajar el mizmo pan, los mizmos kudyos, la mizma medesina, las mizmas kuras?
De otra parte el anunsyo de los premyos Nobel. Entre eyos de muevo un Israelyano ke onora su payis i tambyen mozotros todos ...un premyo ke aumenta ainda mas la proporsyon enorme de savyos djudyos en komparasyon kon la chika  densita kuantitativa de muestro puevlo al seno de la populasyon mundyal.
Ke relasyon entre los dos kavzos? Deke avlar de dos kozas tan diferentes en el mizmo artikolo?
No se... 
Es ke estas viktoryas konsekutivas en el espasyo syentifiko es una simple koensidensya? O byen el rezultado de un largo lavoro?
Un punto es kategoriko, indiskutivle, “no egziste diferensyas biolojikas entre los ombres”, a ke  nasyonalidad  o puevlo  ke eyos apartengan.
Eske las terrivles sufriensas i umilyasyones ke fue durante largos siglos el suerte de muestro puevlo lo pusho a syempre ser vijilente, syempre observar, syempre pensar? puede ser SI, ma es ke esto es  sufizyente?
Es ke el vyejo ovligo pedagojiko de syempre estudyar el talmud, syempre refleksyonar, syempre todo  analizar asta el ekseso, desvelopo posivilidades partikulares en su kampo intelektual? Esto puedra  entrar en la multitud de supozisyones, ma no se si es bastante...
Puede ser la suma de esto todo?