El Antisemitismo en un filmo kon temporano de Hollywood

Aslan I. PALACHI

Kon el aumento de antisemitismo I rasismo en el mundo en los ultimos anyos, un filmo Amerikano resyente projeta esta realidad klaramente. Este sujeto ya fue analizado por el eskritor de estas linyas, aki, en un artikolo publikado en Julio de 1995, ilustrado por el filmo "Gentleman’s Agreement" (Akordo Verbal) ke fue nominado komo el mijor filmo del anyo 1947 por el "Academy Award" de Hollywood.
La novela "Focus" (Enfoke) por el dramaturgo Djudio Amerikano Arthur Miller, bazada sovre su propya eksperyensa en los anyos de la Segunda Gerra Mundial fue la inspirasyon para Neal Slavin, un fotografo Djudio renomado de Nueva York, para la realizasyon de este filmo del mizmo titolo. El livro eskrito en 1945 es una de las primeras novelas ke direktamente konfronta el antisemitismo Amerikano. Slavin deskrive su intereso en la identidad de la persona en lo publiko I lo privado. En su opinyon la imajen simbolika deve eksprimir los sentimyentos I las ideas. Es por esta razon ke "Focus" eksplora el antisemitismo bazado sovre las aparensyas: el protagonista del filmo, Larry Newman (djugado por el aktor William Macy), Kristyano de orijen Inglez, tiene menester de meterse antojos, esto troka su fizyonomia, I en supito sus vezinos I kolegos ke lo konosen desde munchos anyos empesan a konsiderarlo komo Djudio.
Kuando Larry se namora de Gertrude (djugado por Laura Dern), los vezinos la sospetchan, porke komo su marido, eya tambien parese Djudia. Para pasar la fin de semana, los resyen kazados salen afuera de la sivdad, ma, aunke tienen rezervasion, el patron del otel les refuza dar una kamareta. Este akto de antisemitismo provaka en Gertrude una eksplozyon de ravya I se pelea kon el administrador del otel.
Aunke es su primer filmo, el rijidor Slavin pudo konvenser al dramaturgo Miller ke el argumento de su ovra seguira kon fidelidad la istorya del livro. El kree ke las personas komunikan entre eyas a traverso las karas, por esto todos sus aktores tienen karas reveladas ke enkantan la audensya. "Endjuntos" dize el rijidor "los personajes del filmo entyenden bien ke si afilu pueden konvenser los vezinos ke no son Djudios, esto no va solusyonar el problema. Eyos deskuvren el atadijo entre las aparensyas i el prejuiso." Slavin meldo la novela de Miller mas de diez vezes antes de empesar a filmarla. Le gusto muncho el livro no solo por su agudez en la deskripsyon del antisemitismo, ma tambien porke es una metafora por todo el rasismo, todo el rejuiso I el aborresimyento, la sygedad de esto. La ironia sentral de "Focus" es, naturalmente, ke dingunos de los dos karakteres prinsipales difamados son Djudios. Portantan, por modo de esto, Slavin es kapatche de mostrar komo en verdad ilojiko es toda manera de aborresimyento kontra un grupo espesifiko.
"Focus" aze tambien una deklarasyon, sovre el espanto de komprometerse. Al empesijo del filmo Larry Newman, el protagonista, en medyo de la notche se desperta kon un ruido ke viene de afuera. Eskruteando la kaye detras de la kortina (perde) ve a uno de sus vezinos golpeando I violando a una muchacha puertorikenya, de una otra komunidad. No keryendo komprometerse en telefonando a la polisia, Larry retorna a su kama. El, ni se rende kuento ke es solo una kestyon de tiempo antes ke iva devenir un estranjero en su vezindado I ke todos se refuzarian a ayudarle en su situasyon difisil.
"Focus" eksplora komo aktos de aborresimyento empesan poko a poko I kon tiempo no se pueden kontrolar. Relasyonado kon el rasismo I el terrorismo de oy en munchos payizes desvelopados, el filmo de Slavin keda bien en la aktualidad.