Djudios, Marano, Konversos del Portugal en el 16. Siglo

"….OY, EL  PORTUGAL  ES  UN  PAİS  SİN  DJUDİOS.."
Michael  Halevy (Los  Muestros  No. 32 )

Coya DELEVİ

(1*) "El Portugal abrigo en el presipyo, kaji 90.000  Sefaradis ekspulsados de la Espanya,  ke aviyan refuzado la konversyon.  Fue la jenerasyon ke bivyo los 40 primeros anyos despues de 1496, kuando fueron konvertidos de fuersa, fin la kreasyon de la  İnkizisyon  Portugeza en 1536. Son estos Djudios  Portugezos ke fondaron muevas komunidades en el sud-ueste de la Fransia, en Amsterdam,  Londra…" D. M. Gitlitz.          
(2 *) El eskrivano Espanyol, Felipe  Torroba  B. De Quiros, en su livro tresladado al İnglez, esta dizyendo: "..Nasyones komo el Portugal, Fransia, i Republikas  İtalianas, ke syempre kritikaron los monarkos Katolikos achakes de sus "krueldad i indjustisya", portanto, i eyos tambyen,  arresivyeron kon grande ostilidad (düşmanlık) los Djudios vinyendo de la Espanya." Este livro, intitulado "THE  SPANİSH  JEWS" (Los  Djudios  Espanyoles), es un buen livro de referensya.
En la Hollanda, espesyalmente en Amsterdam, los sefardim  profitaron de una libertad relativa de relijyon. No konosyeron la İnkizisyon. Munchos Djudios ke emigraron del Portugal, fondaron komunidades en Amsterdam. Tambyen,  pudyeron tornar a la fey de sus ansestros. Las otoridades Hollandezas les prokuro una syerta proteksyon en diversos domenos, espesyalmente ,en el komerso. İ otras komunidades egzistyeron en Londra , Bordeaux ( Fransia), en Las Antillas Hollandezas,  en   Curaçao, ke es la mas grande isla de Las  Antillas.
(3*) En los anyos 1500, los Djudios ke emigraron del Portugal, se instalaron en Curaçao.  La komunidad  Djudia de la isla, fue la mas vyeja i bivyendo sin interrupsyon (kesintisiz) en esta rejyon."
Antes unas kuantas semanas, tuve la oportunidad de ver un filmo, amostrando en kurto, Curaçao,  i sus abitantes. Mi opinyon es, ke aktualmente , no ay munchos Djudios ayi o se asimilaron. Lo esto repetando, esto es mi impresyon personal, puede ser ke me yerri. La projeksyon de el dokumentaryo del Dr. Eliezer  Papo, " EL  ULTİMO  SEFARADİ ", se izo en el İnstituto Cervantes.
Vinyendo a la Beljika…Anvers, debasho la okupasyon de la Espanya, tuvo una komunidad djudia dezde la Renasensya ( Rönesans).  Los Maranos i aki tambyen,sintyeron el soplo de la İnkizisyon.  Entre eyos, se puede sitar Dona  Gracia Nasi-Mendez  ( La  Senora ) i su yerno Jozef  Nasi ke era en mezmo tyempo su sovrino. Penso azer un artikolo suplementaryo sovre estos personajes selebros de muestra historia.
Komo lo eskrivi  en mi primer artikolo, el Rey  Manuel, dezeozo de aserkarse de los monarkos Katolikos  de la Espanya, dechidio de ekspulsar los Djudios. En el Dekreto de 1496, akordo syertas konsesyones ( taviz) a los  Djudios, kon el eskopo de amostrarse mas umano de Ferdinand i İsabella. Ma, de otra parte, keriya impedir la ekspulsyon, o mas egzaktamente , no keriya ke el Portugal se vazyara….İ la solusyon ke topo era de forsarlos a la KONVERSYON. Esto fue el empesijo de la istorya trajika de los Maranos de Portugal. En 1996, en el 500. Aniversaryo del  Dekreto de ekspulsyon, se organizo seremonias de komemorasyon en Portugal.  El  Prezidente Portugezo, Dr. JORGE  SAMPAİO, dyo una resepsyon.  El governo acheto de rekonoser ofisyalmente la egzistensya de la İnkizisyon  Portugeza.
Aki, kero transferar unos, doz pasajes de un artikolo eskrito en 1997, i sinyado  Jean-Marc Thorbois: (4*)… "A la bushkida de los ultimos Maranos del  Portugal …En omenaje a los ke konservaron sus fidelidad  "intakta" durante sinko siglos…Belmonte, Trancoso, Pinhel... En el presipyo del 20. Siglo, los ultimos  Maranos del  Portugal, arrankados del mundo eksteryor, pensavan ser los ultimos reprezantantes de la Nasyon  d’İsrael, asta ke un kapitano Djudio, de la armada Portugeza, Barros  Bastos, vino a revelarles ke el puevlo d’İsrael, biviya oy en diya, en varias rejyones de la planeta !.."
Reelmente, el artikolo del Sr. Thorbois, una estorya emosyonante, ke vale la pena de meldar. İ  agora, por terminar este artikolo miyo, kero azer otro transfero, ke asegun mi  puede tener un syerto paralelismo  kon el de arriva :
(5*) "Los pokos Djudios bivyendo oy en Portugal, son organizados en kuatro komunidades: Lisbona, Porto, Belmonte, Portimao. Kon menos de kinyentos miembros, eyas reprezentan  unas de las mas chikas komunidades de la  Evropa.  A estos kinyentos, se adjustan otros kinyentos Djudios ke no apartyenen a dinguna komunidad i tambyen miles de muevos Kristyanos ( cristaos –novos),  ke sus famiyas prezervaron el rekuerdo de sus orijines Djudias "
"…Ni la konstruksyon de una sinagoga  a BELMONTE,ni la restorasyon de otra una sinagoga en CASTELO de VİDE, ni el muzeo djudio de  TOMAR, no pueden disimular esta realidad:

 "OY  EL  PORTUGAL  ES  UN  PAİS  SİN  DJUDİOS"
                                                                                                            
( 1*)- DAVİD .M .GİTLİTZ "Secrecy  and  deceit: the religion of the Crypto- Jews"
( 2*)- FELİPE  TORROBA  B. DE  QUİROS "The  Spanish  Jews "
( 3* )-E..BRİTANNİCA.
( 4*)-JEAN-MARC  THORBOİS " Ala recherche des derniers Marranes du Portugal"
(5*)-MİCHAEL  HALEVY " Une famille illustre: Le President du Portugal Sampaio est le descendant d’une illustre famille  sefardi".