Abraham de Kamondo

Dora NİYEGO
(Rezultado de una investigasyon)

Abraham De Kamondo, el reprezantante de la komunita djudia entre los anyos 1785񮔡, era un myembro de los Kamondos filantropikos i grande finansyeros Turkos de orijen Espano-Portugez.
Abraham De Kamondo era nombrado komo ‘El Rotchild del Este, ‘El Grande Kapitalisto’i ‘El Grande Ofisyer’. El, egzerso una grande enfluensya en la Korto de los Sultanes Abdül Medjid i  Abdül Aziz i reusho a obtener un Ferman para los non Musulmanos, dandoles la permisyon de konstruir kazas en el kuartyer de Pera en Estanbol.
Abraham i su ermano İzak fundaron una Banka debasho el nombre: "İ. Camondo & Cie.". Esta banka finanso el Emperyo Otomano en la gerra de Krimea entre los anyos 1853񮔐.
En el anyo 1830, Abraham de Kamondo devino un grande reprezantante de la komunita djudia de Estambol. El fundyo  una administrasyon santral para los Djudyos de la Turkiya. i empeso a azer grandes reformas en las komunitas.
En el anyo 1841, el tuvo una grande influensya en Yerushalayim para la konfirmasyon konsernando el    Primer Hahambashi. Maz dozpues, el tuvo la direksyon de una komisyon para enforteser la ekonomiya de la komunita djudia en  kompetisyon kontra los Ermenis i los Gregos.
Abraham de Kamondo djugo un rolo importante en la transformasyon del  sistema de edukasyon Djudia en la Turkiya. Al empesijo del dyezimueven sigo, el fundyo una eskola moderna  "La Eskola" en el kartyer de "Peri Pasha" en Estambol, para los ninyos proves.
En el anyo 1856, Kamondo arrekojo un grupo de rikos i aklarados reprezantantes de la komunita Djudia, i ayudo a la fundasyon de las eskolas ‘Alliance İsraelite Universelle’. ‘La Eskola’ i las de la  Aliansa fueron el empesijo de la edukasyon evropeana, ma en mezmo tyempo el empesijo de multiples  diskusyones entre el  sentro konservatıvo i el sentrs sekular.
A la fin de estas diskusyones, Kamondo risko de ser ekskomulgado por aver sido la kavza de un sistema de edukasyon muy liberal. El Sadrazam arrekojo entontes el Konsilyo Rabiniko i ansi Kamondo salvo de la ekskomunyon, ma el no kijo mas kedar en Estanbol i en el anyo 1870 se fue a Paris i bivyo aya asta la edad de  ochenta i ocho anyos.
Duspues de su muerte, komo el mizmo  lo dezeyava ,  Kamondo fue transportado a Estanbol i fue enterrado en el simetyero de Hasköy, al lado de los otros myembros de la famiya Kamondo.
La karyera del Konde de Kamondo en Estanbol fue ekstraordinarya i turo trenta i doz anyos. El tuvo grande influensya sovre los Sultanes, Vezires i Ministros del Imperyo Otomano. El lavoro muncho para ke los ofisyeres Djudyos tengan postos en el Governo Otomano. Kamondo fue el Bankyer del Governo Otomano por munchos anyos, asta ke la Banka Otomana fue fundada.
Duspuez de sa muerte, el Governo del Imperyo Otomano izo una grande seremonia memoryal por onorar este grande personaje.