Una sivdad ke no egziste kaji mas

La atmosfera era kayente en el lokal del İfsak , asistensya de todas las edades, ombres i mujeres konsernados por el sujeto.Las preguntas fueron nombrozas i a eyas solas la prova de un enorme interes por la proyeksyon. Uvo se entyende byen multiples kestyones, chikos kambyos de opinyones, una grande espontaneidad en las demandas i las repuestas .
Las fotografias eran eskojidas, echas de mano de maestro, muy artistikas i tambyen muy realistas, metyendo en evidensya las karakteristikas de un lugar dedikado  al plazer malgrado sus kontrastos, rikeza  i  ekstrema provedad, luso i indijensya, modernizmo i kulto de un tyempo pasado.
Fotografias yenas de kolor , a syertos momentos mizmo yenas de luz,  ma a mi pareser kon un fundo de tristeza , fotografias de un immenso kortejyo de karnaval  kompuesto no solo de turistos ma sovre todo de otoktones, de mujeres la mas parte maskadas, vestidas de modos i maneras,  kon todas al torno de la garganta una multitud de "kolyes" , kualos kurtos kualos largos, kolyes de perlas de kolores diferentes, ke los espektadores del karnaval les echavan kuando eyas achetavan de mostrar sus pechadura ...  
Maurice Asseo divizo su proyeksyon en tres partidas: A) el Lunes antes de la fyesta ande se puedia persevir el  espero del plazer a venir , plazer ainda no realizado, ainda intakto, ande todo era esperansa. B) "la fyesta eya mizma" , la  frenezia de una bushkida loka de absoluto en el gozo i la luksurya .C) el dia sigiente "el Myerkoles de Seniza" ..la tristesa de despues la  fyesta, las kavesas ainda entontesidas por el ruido de la noche, i en el korason este himpo de yoro ke kaji syempre deshan los plazeres fujitivos.
Las kayes estavan yenas de bochas vazias i de perlas multikolores ...la luz deslavada del sol de invyerno aklarava sin briyo las paredes a syertos lugares deskoloradas por los anyos. En la atmosfera, una kayades ainda yena de ruido, puede ser la  riza amarga de una mujer ke por seguro no avia topado lo ke eya bushkava .
Deke kijo amostrar esta tristesa despues de la fyesta, Maurice Aseo? Es ke el tenia el presentimyento de lo ke iva afitar unos kuantos mezes mas tadre ? este oraje terrivle ke destruyo todo sovre su pasaje, metyendo en relyeve la injustisya , la disparidad i la flakeza de los ombres.
Despues de la luz i de las kolores briyantes, despues de las rizas i de los dezeos lokos, este pasto de seniza en la boka...Amerika payis de kontrastos  ande la rikeza fabuloza bive lado kon lado kon la mizerya... ande la ermozura i la fealdad, el integrizmo i la libertad  se tokan los uno los otros, ande el pluralizmo  i las singularidades azen parte de un mizmo puerpo ...
Eske esta proyeksyon era una pintura del ombre en la multiplisidad de sus dezeos? En su semejansa kon los otros i en mizmo tyempo en las miles partikularidades  ke azen de kada uno un mundo a parte?