Klara PERAHYALa semana pasada en la sala de Ifsak (Istanbul Fotoğraf ve Sinema amatörleri Derneği), asisti a una proyeksyon fotografika realizada por Maurice Aseo, poko tyempo antes del ravaje krual provokado por el oraje Katerina, dandomos ansi la vizyon del ultimo karnaval fyestado en la sivdad de New Orleans, el karnaval del " Martez graso" ("Mardi gras", fyesta kristyana ke tyene sus raizes en la leshana mitolojia, fyesta dedikada al plazer i a la sensu
Dora NİYEGO
Alhad la noche mos fuimos a ver el filmo de Radu Michaileanu, ‘Va, vis et deviens’. Komo lo pensava el sinema estava yeno de mi ‘puevlo’- komo una amiga miya moz yama.
Komo el sujeto mos enteresa, todos salimos del sinema emosyonados, las lagrimas en los ojos.
El filmo esta pasando en Israel i la grande parte de las konversasyones son en Ivrit.
Michaelileanu mos esta amostrando los elementos de la vida reel de Israel antes vente anyos i ke no se trokaron oy en diya;
Una madre ke kere embiyar a sus ijos afuera de Israel para ke no se vaygan al servis militaryo; el patriyotizmo de un padre dizyendo ‘Aki es mi patriya, si todos pensan a irsen ken va defender Israel’; las ideas de los fondamentalistos; los Israelyanos sosyalistos ke keren dar tierra a los Arabos para ke ayga pas; la vida dura en los kibutsim; el nono ke esta kontando a su inyeto kon ke difikulta kultivaron las tierras i ensembraron arvoles; las gerras kon los Arabos ke no eskaparon oy en diya.
Michaelileanu mos esta kontando i amostrando esto todo komo en un filmo dokumenter.
El sujeto prinsipal del filmo es el eskarinyo i la problema de identita de una kreatura Etiopyana ke fue embiyado a Israel par su madre kon los Etiopyanos djudyos para salvarlo de la muerte. La problema de identita no es etranjera a los djudyos ke bivyeron miles de anyos en la diyaspora.
En el filmo estomos vyendo la difikulta de la entegrasyon de miles de djudyos Etiopyanos ke vinyeron a bivir a Israel en el anyo1984. El prejuisyo, el rasizmo i la mankansa de toleransya ke son la flakeza de la persona, egzisten oy en el puevlo del Israel moderno. La persona se esta enkantando de ver esto; los padres i los nonos de este puevlo son los ke sufrieron lo mas del rasizmo i del antisemitizmo.
Las madres de los elevos Israelyanos ke estan refuzando de mandar sus ijos a la eskola porke ay un Etopyano en la klasa; el malkomporto de sertenos Israelyanos; la reaksyon de los konservativos kontra la kolor de los Etiopyanos i el malkomporto de un padre al amigo Etiopyano de su ija son unos kuantos de estos egzamplos.
Ma a la fin del fimo Michaileanu mos esta dando un mesaj optimisto dizyendo ke la amista ke es la mas grande fuersa de la persona va ganar un diya i ke ay esperansa ke todo se va azer bueno.
