Novelas... Novelas...

İzidor Baruh ke kumplio mas de 20 anyos de servisyo,  en su kualidad de responsavle ofisyal del djornal
Silvyo Ovadya, aktual kapo de muestra komunidad, por su lavoro kreativo sin interrupsyon en tanto ke koordinador durante nombrozos anyos
dos ombres de grande valor, los kualos transmetyeron sus kargas, el primer a Yakup Barokas, el segundo a Moris Levi.
El historiko fue echo (kon emosyon i respekto) de la kreasyon de la gazeta ŞALOM en 1948, ansi ke de su pasasyon  a una mueva ekipa en el anyo 1983/84, a la sigida de la muerte de su fundador Avram Leyon, ke su alma repoze en paz.
La asistensya guadro un punto de silensyo en su onor i su memorya ansi ke a la memorya de todos los kolavoradores ke tuvimos la amargura de pedrer durante estos ultimos anyos.
Despues de la seremonia, syertos amigos kedaron para akodrarsen rekordos del pasado ke kada uno konto kon emosyon i un poko de umor.  El grande muzisyano Muammer Kentencoğlu mos izo oyir kantes nostaljikos. Una enorme torta fue kortada i espartida entre todos. La atmosfera era yena de amistad i puede ser en kada kavesa espunto el premisyo de un muevo proyekto.

Komemorasyon de la muerte de un grande ombre
Alhad  demanyana el rekuerdo del Prof. Selim Kaneti fue komemorada 13 anyos despues de su disparisyon, El Kadish fue dicho kon devosyon i fervor.
Grande universitaryo, persona de alta valor moral i intelektual, el era un ombre en mizmo tyempo muy savyo i muy amavle, syempre avyerto a los problemas i demandas de los ke lo aserkavan,  sonriente i korajozo asta el ultimo punto.
Ke su alma repoze en paz.
Su nombre kedara syempre eskrito en letras de luz en muestra memorya.

Enkontro artistiko pluri-kultural en el Instituto Italiano de Estambol
Shabat lanoçe el 19 del mez koryente, a las oras vente, una ermoza realizasyon artistika tri-kultural: "Turka", "Ebrea" i "İtalyana" tomara lugar en el Instituto Italiano di Cultura (Kaza de Italya).
En el programa: Ruth Yaakov de Israel , Miriam Meghnagi de Italya, Muammer Ketencoğlu, Sumru Ağıryürüyen, Aytunç Matracı, Rahmi Göçmen de Turkia.                       
Topadura de kulturas, kantes de diversos lugares del mundo... Israelyanos kon Ruth Yaakov,  Italyanos, sefardis i  Norte-Afrikanos kon Miriam Meghnani, Turkos kon Muamer Ketencoğlu i sus amigos.
Mos toparemos todos enjuntos en este ermozo enkontro kultural, en esta nochada de amistad, de alegria i de gozo.