Alhad demanyana la somptuoza sala de la Munisipalidad de Livorno estava yena asta tener nombrozas personas en pyes ...Arresivo muy kayente de la parte de los dirijentes... Ambiente amigavle... Karas sonrientes, avyertas, prontas al dialogo... Kontakto kaji otomatiko en la asistensya.
El tema prinsipal de la konferensya fue: "Kultura i Tradisyones Sefardies en el Pasado, el Prezente i el Futuro".
Este kongreso no fue solo una reunyon de lavoro, ma tambyen un enkontro, un kolokyo… kambyos de impresyones kon personas ke no konosiamos dos oras antes, preguntas, repuestas, topadura kaloroza kon vyejos amigos.
La avyertura ofisyal del kongreso tuvo lugar a las oras 10.30 .. Sovre el Podium: "Guido Guastalla" i "Yitzhak Navon" Prezidentes de la Konferensya, "Shmuel Zarrugh" Prezidente de la komunita de Livorno, Luciano Barsotti, Amos Luzzato, Giorgio Kutufa, Alessandro Cosimi, Enrico Giaccherini, Riccardo Nencini.
En la asistensa: Numerozos notavles i intelektuales İtalyanos ansi ke nombrozos estranjeros venidos de diferentes otros payizes, selebres profesores, myembros del korpus ensenyante de grandes universidades, entre los kualos los partisipantes: Prof. David Bunis de la Universidad de Yerushalayim, Prof. Yakov Bentolila de la Universidad Ben Gurion, Prof. Alisa Ginio-Meyuhas de la Universita de Tel-Aviv, Prof.David Cassuto de la Eskola de Arkitektura-Israel, Moshe Shaul investigador i fundador de la revista "Aki Yerushalayim, Prof. Arthur Kiron de la Universita de Pennsylvania, Prof. Ariel Toaff de la Universidad Bar-Ilan, Dov Hacohen del İnstituto Ben-Tzvi , Prof. Maria Mayer Modena de la Universita Statale de Milano, Dr. Gabriele Bedarida de la komunita de Livorno, Rav. Prof. Giuseppe Laras de Milano, Prof. Haham Isaac Jerusalmi direktor del "Jewish Studies İnstitute-Cincinnati, Prof. Michele Luzzati de la Universita de Pisa, la eskritora Matilde Koen Sarano, Jean Carasso fundador de la "Lettre Sepharadee", Moise Rahmani fundador de la Revista "Los muestros", Alegra Amado ben-Itzhak de la Radyo "Kol Israel", Matilde Gini de Barnatan de la Radio exteriot de Espanya, Judith Rouman de Wahington, Daniele Bedarida de Livorno, Miriam Meghnagi de Roma.
La sesyon venia de empesar kuando, a un syerto momento, vimos entrar Yvette i el Prof. Giacomo Saban, orijinaryos de muestra sivdad. El , unos kuantos anyos antes, fue Prezidente de la Komunidad Judia de Roma i tuvo el onor de resivir el Papa Paul II en la grande Kehila de la Kapitala Italyana.
Yvette i Giacomo venian direktamente de Roma de ande se avian metido en kamino de madrugada, a la 6 de la manyana ..Todos se presuraron a asegurarles un lugar i (modifikando el korso previsto de las avlas) el moderador demando al Prof. Saban de dizir unos kuantos byervos..
Aunke no estava aparejado a avlar en esta sirkunstansya, el aksepto kon simplisidad i lo ke disho izo una muy fuerte impresyon sovre la asistensya en su totalidad...El empeso kon estos byervos: " No vos vo avlar ni en İtalyano ni en Inglez, ma en Judeo-Espanyol ...oy es un retorno". Despues, Giacomo mos avlo de un grande Shaliah instalado en Livorno (nombrado, si no me yerro, Azulay) ombre de sehel i de grande saveduria ,el kual no se adresava nunka a los yahidim en Ebreo ni en İtalyano ma en Judeo- Espanyol".
Un otro momente muy fuerte del Kongreso fue la avla de Yitzhak Navon, el kual kon su maraviyoza simplisidad (karakteristika de los grandes espritos) i kon su avla franka i direkta devino el simbolo del esforso echo aktualmente para rekuperar muestra vyeja lingua ansestral.
Es una realidad irrefutavle ke la kreasyon de la "AUTORİDAD NASYONAL DEL LADİNO İ SU KULTURA" rendyo al Judeo-Espanyol su dinyidad de lingua biva, lo ke sostyene el koraje de los ke luchan para ke este idyoma no muera.
Aki es el lugar i el momento de pronunsyar tambiyen un omenaje enverso todos los pionaryos ke lavoraron i ainda lavoran en este kampo i partikularmente enverso el Prof. Haim Vidal Sephiha ke dediko toda su vida a este eskopo.
Es en esta lingua ke durante largos siglos la madre Sefarad kanto en kunando sus ninyos, ke mujeres i ombres rieron i yoraron. Es esta lingua ke kontribuo a mantener el Judaizmo en vida, durante los anyos eskuros del galud.
Si, fue un grande kongreso, el kongreso de Livorno, dedikado a muestro vyejo idyoma, a muestra Kultura i a muestras Tradisyones, i mizmo a muestro Gizado....El fue tambyen un enkontro dedikado a la amistad i a esta kostumbre Judia kaji atavika de syempre kedar unidos, de ke payis ke vengamos...
Komo lo dishe al prinsipyo de este artikolo, la Komunidad de Livorno mos resivyo kon un senso partukular de la hospitalidad : kudyo permanente, pransos rikos kon komidas muy savrozas, sedjorno en uno de los mijores oteles de la sivdad, etc...
Fueron oras inolvidavles, las ke pasimos al torno de las mezas de dezayuno, avlando i diskutyendo kon grande profesores i los momentos de gozo i rizas kuando Matilda Koen Sarano mos konto kuentos de Djoha.
Toda muestra gratitud a la kolektividad de Livorno i a los djenerozos esponsores ke permetyeron la realizasyon de un semejante simpozyo.
