Amerika del Sur! Ke lugar maraviyozo

Beki BARDAVİD

L’Amerika del Norte del punto de vista politik, del punta de vista finansier o por otras karakteristikas, no moz vino al tino de ir a vijitar. Portanto las Amerikas del Sur, eyas estavan syempre en sus lugares sin del todo meneyarsen.  Viyajavamos siempre a NewYork, al Kanada, o kon las kreaturas a Orlando, etc.  Nunka no pensimos ir a las Amerikas del Sur. Portanto fue yerro.
Lo ke no enkontri en ningun lugar lo enkontri en estas Amerikas.  Por egzempyo mujeres muy lindas; kaskadas de una fuersa enkreyivle; i sovre todo las glasieras. Esto todo fueron kuriozidades ke no enkonti asta agora en otros payizes. Sovre todo las glasieras estavan uno de ver otro de kontar. Estas glasieras eklatan kaji kada tres puntos, l los hielos ya se keren fuyir de estas 60 milyones de tonas ande estan enserradas. İ lo demazia lo vazyan a la mar ke las entorran. El un glasier se yama ‘Perito Moreno’ o ‘El Kalafat’ i el lugar es Patagonia.  Me akodro ke kuando era chika por un echo ke no se realizava o por un lugar ke no se pudiya alkansar, se diziya Patagonta. Patagonia keria dezir ningun lugar, i nunka.  Era un lugar imajinario, sin personas.  Por tanto tiene un ayriziko tan yelado ke vos viene bronshit sin darse a sintir.
Vos van a dezir ‘no te vayaz a Sao Paulo ke no ay nada de ver’. No vos kreyaj i anda a Sao Paulo, ke ay tanto de ver i ke es una sivdad tan kurioza. Vos va pareser ke estaj en Maslak, una rejion de Estambol, tanto altas son las batises.  Los hoteles kaji ke alkansan al sielo.  İ custo allado esta yeno de ‘gecekondu’ o bidon-ville.  Es un lugar de kontrastes.  Vedra ke vale la pena ir i kedar unos kuantos dias.
Ya puedej dezir ‘yo va vide Buenos Ayres’ si ya estuvitej en Madrir.  Sera i es asi, ke son los Espanyoles ke fraguaron esta sivdad.  Es un rikeza, un fasto ke no se enkontra en otro lugar o ke se enkontra en Paris, en Londra, etc. Puedej enkontrar todas las ‘markas’ ke gustaj, i mizmo si kerej oro, diamantes... Si kerej merkar djoyas es en Buenos Ayres o en otras sivdades de la Arjentina ke enkontraraj.
Vedra ke son poka djente en una area immensa.  La mas parte son proves. La tierra no vos da nada.  Seya Buenos Ayres, seya las otras sivdades ke vijiti, estan yenas de sedakeros.  Madres kon bebes en la trips i en los brasos vos aranka el korason. En todo los payizes ay estas vistas, la koza es ke en Arjentin i en en Brazil ay mas muncho.  La Arjentina esta ariento las devdas, portanto kreyo ke no lo esta aziendo ansiya.
Montevideo tiene la forma de un korasoniko. Es muy chiko Montevideo, i ay muncho de ver.  Es una kosta maraviyoza kon un ayriziko enkantador.  Kazas luksuozas, villas estan en el bodre de mar i todas maraviyozas. Ay munchas sinagogas, eglisias, i  meshkitas.  Las relijiones biven endjuntos i nunka ay peleyar.  Es un payis sereno, kalmo i vedra muy ermozo. 
İ un poko avlaremos de Chili. Un payis largo-largo, estrecho-estrecho. Se esta renuvelando. Las batises viejas son luzyas i Santiago de Chile poseda un muzeo kolombiano ke vale la pena vijitar.  Aya estan las sivilizasyones primeras, los İnkas, etc.. Santiago de Chile vale la pena kedar unos 4LJ dias i bivir aya.n eya. Es uno de ver otro de kontar.  Mos resivyo la Universitad de Chile kon sus profesores, sus ensenyantes. İ resivimos envitasyon para vinir i avlar. Veremos, kaminando i avlando.
La Amerika del Sur tiene agua para siglos i siglos. Estas glasieras ya los menaja a lo manko 3dž siglos. İ entremiente va aziendo inyeve i nunka se amuenga las tonas i tonas de agua. A eyos les manka el pan de kada dia, i vedra ke esta bien difisil de ganarlo kon estas tierras ke no produizan nada. 
Aunkontodo de ke torni esto pensando a la Amerika del Sur, su klima komodo, sus personas ke paresen sin penserio, su natura vedre, vedre, vedre...
Ke dizij, iremos a bivir...