UNA VIJITA

Coya DELEVİ

Ke dizish, si oy azemos, todos endjuntos, una vijita a la kaleja Atiye, en Teşvikiye. Ayi se topa el imoble del "ŞALOM", ande vo unas kuantas vezes al mez.
El primer ke saludo, es el uno o el otro de los kargados de seguridad. Son doz mansevos, ke, kon alternansa, kontrolan seya la enterada de la fragua, o seya arriva, delantre la komputadera  (bilgisayar). Si, par azardo, manki de ir una semana, ya me dizen: "Coya Hanım, ay muncho tyempo ke no te vemos!.."
Suvo kon asansor asta el ultimo etaj. En entrando, las primeras ke renkontro, son las simpatikas muchachas, Bella i kaji sin falta, Roza…Es de demandarle si no se enfasyo de mis telefones!.No es ke bushko para azer moabet, absolutamente no!..Es de echo ke avlamos, komo se dize "iş görüşmesi!!.."
Bueno, en el etaj,  echo un ojo a la kamareta ande lavoran, Gila  Erbeş i Karen Gerşon Şarhon, kada una en otra punta de la sala…Me parese ke para komunikarsen, deven emplear el telefon o echarsen e-mail!, tan leshos estan una de la otra. Esto, seguro ke es shaka, ma, reelmente es un salon bastante grande. Despues de la restorasyon, se izo muy  elegante (no esto segura si se emplea este byervo aki, al lugar de "şık") Si estan okupadas, les do un saludo de la mano. No manko tambyen de dezir un "merhaba" a Anet, syempre lavorando.
En vezes tengo la shans de renkontrar muestra amiga Klara Perahya, en el buro de Karen. Entramos alora, en una konversasyon ardyente (hararetli), ke tyene komo sujeto,  el Judeo-Espanyol, o "EL  AMANESER". Ay probabilidad tambyen de vermos i kon Güler Orgun, la presyoza koordinadora de "EL AMANESER" i kon Güler tengo un buen dialogo.
Me parese ke kedimos demazia en este etaj,  suveremos de la eskalerika interyor… A la syedra, el muevo salon de reunyon. Oy esta vaziyo, no ay menester de atrazarmos aki… Ala drecha, de vista remarkamos unos kuantos pupitros, todos kaji, kon komputeres. Enfrente  de uno de estos, Eti Varon, syempre meldando,  eskrivyendo, ma, nunka inaktiva… Aki la kero rengrasyar por las angarias ke le do.
Enfrente, la kerida Tilda (Levi )… No miresh ke dishe kerida! En la iyerarshia del jurnal, eya es mi superyor. Es eya ke melda mis eskritas, i da su aprovasyon (onay). Entre mozotros!, fin oy, no me refuzo dingun artikolo!. En jeneral, ago mis vijitas despues de la aparisyon del jurnal. Si no esta muy okupada, me plaze azer kon Tilda, un kurto moabet, sovre la vida, sovre el "Şalom". Malgrado muestra grande diferensya de edad, mos entendemos muy byen, komo doz amigas.
Aki kero nombrar a Nelly Barokas, ke de una manera, me enkorajo a eskrivir en Judeo-Espanyol, antes tres anyos. Tambyen, mezmo si es ralamente,  renkontro Ester  Yannier, ke syempre me aze un resivo afavle. En este etaj, se topa la kamareta de "mise en page" (dizgi). No puedo rengrasyar bastante Semra, ke en kada okazyon, es pronta a ayudarme. "Sağolasın  Semra"… De mezmo, aki lavora Bella, ke nombri en empesando.
Si me okazyona de ir un Lunez o Martez, ay un grande garupo lavorando komo bizbaz,  para aparejar el jurnal a la publikasyon. Esto regretando de no pueder sitar a todas de nombre i, enfin, ay unos, doz miembros del personel, ke syempre saludo. Me parese ke es ora de kortar kurto esta vijita. Mos espartiremos en suetando reushita i publikasyones fertiles.