En el primer etaj se puede ver las diversas koleksyon de mizuras utilizadas en Anatolya. En el mizmo etaj se topa la koleksyon de Seramikas "Kütahya Çinisi".
La kolleksyon de pinturas Oryentalistas konsiste de maz de trezyentos tablos empesando del 17 en siglo fista el empesijo del 19 en siglo. Entre eyas la famoza pintura de Osman Hamdi "Kaplumbağa Terbiyecisi".
El Oryente, de munchos siglos antes atiro la atensyon del Oksidente. Los artistos Evropeyos fueron enkantados de la vida eskondida del Oryente. En vezes se metyeron en kamino para ver lo ke se pasa en el Oriente; en vezes pintaron lo ke les pasava por la imajinasyon.
En el arto Evropeyo del 19 en siglo, paralel al romantizmo nasyo el Oryantalizmo. Un grupo yamados "Boğaziçi Ressamları" (pintores del Bosfor) empesando del 18en siglo pintaron 2 siglos diferente partes de los teritores Otomanos.
La vida de kada diya de la mujer Otomana era ansi: En el Harem, aparte de avlar, brodar o de bever kafe, no teniyan otro pasatyempo. Tener musafires, organizasyones kon muzika era un grande trokamyento. Las mujeres se okupavan de muzika.
Los pintores Evropeyos izyeron portres de las mujeres, mostrandomoz espesyalamente las vistimyentas. Aviya una moda entre los ambasadores etranjeros; azersen el portre kon las vistimyentas Otomanas. Los pintores ke no puediyan topar modelas Muslumanas, pintavan las mujeres Gregas, Ermenias, Judias i Levantenes. Las mujeres Otomanas se aziyan pintar por las pintoras komo Henrielle Brown i Mary Walker. Dospuez de eskapar estos portres los eskondiyan mizmo de los servitores de kaza i los guardavan en un armaryo.
