Solamente, aki antes de avansar en mi artikolo, kero relatar un pasaje ke meldi en una revista i ke tyene relasyon kon la sovredicha palavra de Descartes. El jurnalisto esta pretendyendo ke el famozo filozofo tyene dicho: "La palavra miya (esto pensando, dunke ya esto), ke dishe entervalo de un djugo de poker, fue mal interpretada. Ma, esto kontente de este yerro’’.
Keridos lektores, seriya esto una shaka, un espri de jurnalisto? No se. Porke nombrozos pensadores, adoptaron el punto de vista de Descartes, lo ke es una prova del fondamyento filozofiko de esta teoria i demas, no topi dingun indisyo testiguando, ke en la epoka de RENE DESCARTES (1569), ya se konosiya el poker.
Para unos, puede ser ke es sufizyente de pensar. Otros preferan tambyen transformar sus penseryos en byervos, en frazas.İ los ke tyenen un poko de pasensya, una buena doza de amor de la pendola,i puede ser un poko de talento!, dezean ke estos byervos seyan turavles, konkretos, preto sovre blanko: kijo dezir eskritos o imprimados.
Djusto aki es el momento de transferar una refleksyon anonima ke meldi entre un artikolo de muestra amiga Ester Yannier (Şalom 2 Marso 2005): "Muestros byervos son las vestimyentas de muestras ideas. Devemos vestirlas komo se deve’’. Vestir mis ideas a mi manera, es egzaktamente lo ke me plaze azer. Si lo ago o no, komo se deve, es otra kestyon!... A la eksepsyon de unos kuantos de mis artikolos,en jeneral, prefero no entrar en sujetos muy seriozos, komo politika, ekonomia ets..
Naturalmente, esto no kere dezir ke no so al koryente de la aktualidad, de lo ke se pasa en el mundo i en muestro pais Yo adopti un stil ke se puede kalifikar de livyano, mas o menos una forma de moabet, afilu en ekspozando las realidades de la vida. Perkuro a dar mesajes pozitivos a traves mis linyas. Mi objektivo es, kon mi modo de eksprimirme, alkansar a kada nivel i edad de lektor ke esta meldando esta oja de Judeo-espanyol. Espero ke reushi en una mezura.
"El ombre sezudo melda los livros, ma melda tambyen la vida direktamente" Esta fue una dicha Kineza (ÇİN).Es una de las preferidas miyas, i muy sinyifikante. Eksprima totalmente mi filozofia, mi konsepsyon de la vida. Syempre lo repeti ke la vida es una eskola i lo ke mos embezamos en bivyendo, no lo topamos, no lo meldamos en dingun livro. Afilu las konsejikas ke relato de vez en kuando, son tomadas de mi derredor. La vida es komo un pozo ondo ande se topa materyal abondante para el ke kere bushkar..
Me esto rendyendo kuento ke ya se izo el treser anyo miyo en el "ŞALOM", este artikolo se esta azyendo un poko espesyal. Reelmente, en empesandolo, no teniya dingun plano, dinguna idea prechiza. Los byervos se alinyaron otomatikamente!.. Portanto me esta paresyendo ke empeso a asemejar un poko a una reklama de C. Delevi, sin kererlo espesyalmente. Por esta razon no kero alargar. Esto metyendo el punto final, en esperando de toparmos en otro moabet.
