Martes el 6 del mez koryente fue un dia de gozo i de alegria en la Matan Baseter, asistensya nombroza, komida savroza, atmosfera yena de amistad i de konvivyalidad.
Klara PERAHYA
Kualo es una komunidad en esta epoka de globalizasyon ande a kada momento mos topamos en un muevo kuadro, kon personas ke no konosiamos ayer i ke puede ser no vamos a ver amanyana?...
La globalizasyon es por seguro una koza valutoza, paridera de muevos proyektos i inventos ansi ke de muevas realizasyones, promesa para los mansevos de opulensya i de orizontes deskonosidos, ma en mizmo tyempo, eya es un mundo en rebuelta, en konstante instabilidad, karas anonimas a las kualas no se puede meter un verdadero nombre, ojos ke vos miran si vervos reelmente .. soledad en la multitud, ainda mas amarga ke en kualkyer otro kavzo.
Una kestyon mos vyene al tino :"Kualo es reelmente una komunidad en este mundo perpetualmente en trokamyento" ? Por seguro, un punyado de mujeres i ombres, por la mas parte diferentes los unos de las otros, kada uno kon su karakter propyo, sus problemas o sus aspirasyones ...Si, entre eyos puedra aver "diverjensyas i litijyos", "opinyones i puntos de vista opozados", ma una koza indefinisavle los ata los unos a los otros... puede ser una mizma kreensa, una mizma esperansa o puedeser un patrimonyo kultural komun... mezmos rekuerdos, mezmas tradisyones, mezmos uzos i kostumbres... Entre estas personas, ay inkontestavlemente (de serka komo de leshos) una solidaridad invizivle ke no se puede nyegar... la kayentor de una mirada amiga, la dulsor de una palavra de afalago, un kudyo perpetual ke yo personalmente senti estas doz de alkavo semanas.
Una komunidad es esto... "Bozes amigas ke rompen el silensyo de los dias de anksyedad ", "La bendisyon de un Rav", "La mano de una persona ke konosesh de leshos i ke entorna vuestra puerta para dezir -geçmiş olsun, sano ke lo tengas- i ke presto desparese para no aturvar"...."Medikos amigos por los kualos el hazino no es solo un kavzo entre otros, ma una persona en su dinyita de "ser umano", "Paryentes i amigos ke akorren para asegurarvos ke estan prontos a ayudar".
Azer parte de una komunidad, es la esperansa, para ken ke sea, en ke kavzo ke sea, de oir palavras ke vos konsolan, es la kayentor de no ser un individuo sin nombre, es la posivilidad de pueder komunikar.
Una komunidad, es un pedaso de umanidad arrankado al anonimato syego, sodro i sin identidad de la indiferensya.
