El anyo pasado, en el vapor de Ada renkontri a la ija de una ansyana vezina miya. Reelmente aviya muncho tyempo ke mos pyedrimos de vista, kada uno kon sus okupasyones i problemas. Fue kon grande pena ke me embezi la pyedrita de su marido, antes 7NJ Mezes.Kontinuo kon estos byervos: "Kedi sola a la edad de 42 anyos, sin kriatura i sin revenido. Mi marido era kontavle en una grande kompanyia. Seguro ke me pagaron una chika indemnidad (tazminat). Malgrado esto, deshi mi kaza i me fui a morar kon mis paryentes. Komo ya lo saves, fin oy, nunka tuve menester de lavorar Todos los ke avlo, me dizen ke fui una privilejyada (ayrıcalıklı).
"Esto achetando ke era ansi, fin oy, elevada en una famiya mas o menos prospera. Mi sola okupasyon despues ke kazi, fue ekilibrar un budjeto kon lo ke ganava mi marido. Ma, agora esto en difikultad, tengo menester de lavorar. Ande me esto aderesando, me demandan mi espesyalizasyon. Komo puedo tener, yo ke no fui preparada a nada?
"Portanto, konosko lingua estranyera, un poko daktilo, me entyendo de moda, de antikitas ets.. Enfin, esto pensando ke puedo dar lisyones a elevikos de eskola primera. Me esto sintyendo kapache de azer "KAJİ" todo!.Tenyendo tantas relasyones,rekomandasyones, komo puede ser ke no esto tomando un rezultado pozitivo a mis demandas de empyego?"
Le respondi a esta manseva, ke en muestra epoka, es indispensavle de posedar una profesyon ke se konose bueno. Es evidente ke miles de personas saven azer "kantidad de kozas", ma no muy byen, sin konoserlas komo se deve. Le oguri shans i pasensya i mos espartimos despues de tomar su numero de telefon. Me esto averguensando de konfesar ke negliji este epizodyo, embolvida en mis okupasyones i penseryos… Asta el diya ke sinti de una amiga jurnalista, un pasaje kaji semejante.
Esta amiga, topandose en el buro del direktor del jurnal, entro un manseviko,prezentando una letra de rekomandasyon bastante "influente!.."Kualo keres azer ?" le demando el direktor.
"Oh! no importa kualo..No se..Azer reportajes kon parlamentaryos, o puede ser la oja de spor... Me plaze pasar los alhades en las tribunas del stadyum ..o, puedo ser kritiko de sinema..Enfin, no importa kualo!"
"Syenteme, mansevo! Melda bueno muestro jurnal,.si remarkas ke aktualmente, en el, manka un sujeto ke konoses byen. Alora, si me traes un elemento muevo i enteresante, va konsiderar tu demanda kon atansyon."
La entrevista terminada, mi amiga le disho al direktor,ke se aviya komportado muy duro.
"Puede ser ke fue ansi, ma ya me enfasyi de estos mansevos ke saven azer "kaji" todo, ma no komo se deve" respondyo el direktor.
Aki ekspozi doz kavzos kaji semejantes. Naturalmente, el briyo, el vernik, las konosensyas jeneral, ma, superfisyalas no fueron nunka danyozas. Ma no son tambyen sufizyentes en munchos kavzos, para una reushita materyal. Kreo ke no ay menester de otro komento. Lo ke puedo adjustar es una dicha de Lord Chesterfield: "TODO LO KE VALE LA PENA DE SER ECHO, MERESE DE AZERSE BUENO "
