Kada manyana naso pagano i devo devenir Judyo
(Chaque matin je nais paien et je dois devenir juif)
-El Judyo de Psysha-
Klara PERAHYA
Es difisil de ser Judyo en esta epoka de fanatizmo i de sospecho, ande la mentira es prezentada komo verdad i ande el aborresimyento es mas fuerte kel amor, i portanto mos enganchamos a muestra identidad de ijos de Israel.
La semana pasada meldi en la revista "Information Juive" un artikolo muy interesante de Josy Eisenberg (selebre filozofo relijyozo Judyo de Fransya) sovre un sujeto enteramente diferente del prezente. A la fin de este artikolo el otor sito la refleksyon de un grande Haham Hasidik . "kada manyana naso pagano i devo devenir Judyo" ..
Esta refleksyon se enfinko en mi meoyo asta devenir kaji una obsesyon ..."kada demanyana naser pagano i devenir Judyo" ?
En efekto, el Judaizmo es djustamente esto: "una perpetual bushkida", "un perpetual interrogatoryo", "el esforso kontinual de asumir muestra apartenensya a una relijyon ke tyene en su fundamento, no solo dogmas a los kualos mos devemos someter, ma una responsavilidad etika".
Estranyo paradokso ke un Judyo, echo en mizmo tyempo de universalizmo i de individualizmo, de fey i de dubyo, el yeva en sus entranyas, en el fondo fondo de si mizmo, la terrivle kompleksidad del umano en su kondisyon de "ser pensante".
Para ayegar asta la sertitud, el save ke kale pasar por el dubyo... toparse un syerto tyempo solo delantre si mizmo, deznudo en su espanto, sin apoyo ni luz para giarse
Ken ke el sea, poderozo o flako, a kada dia puede naser en el un muevo ombre, riko en sentimyentos i voluntad.
Kada amanesimyento es una mueva esperansa, una mueva posivilidad, la posivilidad para kada uno de entre mozotros de azer un akto o de dezir una palavra ke kontribuira (mizmo si es en muy chika kuantidad) a asegurar ainda mas la perenidad de muestro puevlo.
