El Espaniol, komo diziamos, se ambezava en kaza, de la madre, el padre, los nonos i las nonas. Naturalmente, se avlava en las kayes i las kalejas, en las grutas i las lokandas, en toda la sivda.
Mas tadre, mismo los Turkos, los Kristianos i los ajenos ambezaron la lingua.
Los ke nasimos despues de la Shoah, sintimos en muestra kaza los "grandes" favlar entre eyos en Ladino ma nunka no pensimos a uzarlo.
Anios mas tadre, deskuvrimos ke teniamos guadrado en muestro tino i en muestra alma la dulse muzika de esta lingua presioza.
Kon estos penserios, sinko anios atrás, unos kuantos "lokos" i "romantikos" empesimos el "Ladino Society" komo repuesta a todos estos ke dizen ke la la lingua se murio. El rezultado ofisial fue las tres "Konferensias Internasionales sovre el Djudeo-Espaniol" ke se organizaron aki, kon importantes profesores d’el mundo entero ke por muchos anios estudiaron i estudian el sujeto.
Kon todo esto tomimos el koraje de kreer una klasa para dar seminarios de Ladino, avierta a todos, kon kuatro profesores (Viktoria Benozilio, Nina Benroubi, David Kounio, Erika Zemour) para allivianar el pezo de las oras dedikadas.
En el empesijo, una grande parte de los elevos eran los ke –komo mozotros- sintieron la lingua en kaza ma tenian de menester de aver la okazion de sintir i avlar la lingua. Ma avia i estos ke sintieron la lingua mas tadre (despues de un matrimonio kon djidio sefaradi) i kierian ambezarla.
Oi tenemos en klasa fina kinze elevos. La meata son Kristianos djovenos ke se enteresan no solo a la lingua ma tambien a la kultura sefaradita Saloniklia. Esto es un fakto ke mos maraviyo a todos mozotros, djidios de Salonik.
Ken disho ke Salonik se ulvido de su istoria?
