Aktos sinyifikativos kargados de esperansa
Klara PERAHYAOy, en esta fin de anyo ke fue partikularmente kruel para la umanidad (krueldad de los syelos , krueldad de la tyerra , elementos meteorolojikos en rebuelta, aktos sanginaryos entre ombres al servisyo de falsos ideales, pedrita de la konsensya umana i del senso de la responsavilidad enverso el otro, ets...ets...) oy, syento el menester de avlar de kozas rekonfortantes , de kozas ke mos daran esperansa...Se trata puede ser de una muy chika luz en las tinyevlas, por se
No se kuantos de muestros lektores frankofones tuvyeron la okazyon de meldar la kurta novela ke paresyo, la semana pasada, en la revista Franseza "l’EXPRESS", al sujeto de una asosyasyon filantropika nombrada "Un korason para la paz" (www.uncoeurpourlapaix.org), kreada para ayudar los ninyos palestinyanos ke sufren, desde el dia de sus nasimyento, de una malformasyon kardyak muy frekuente en los rezin nasidos, konsekutivamente a la grande frekuensa de kazamyentos entre paryentes serkanos.
Esta hazinura es mortal si no se intervyene a tyempo, i kuravle por 95 % si se lucha desde los primeros dias.Una ekipa de medikos espesyalistos Israelyanos del Ospital Hadassah , tomo en kargo la operasyon i los kudyos medikales i la dicha asosyasyon asume los gastes aksesoryos , lo ke revyene, en su totalidad, a 12000 Euro.
Vincent Olivier de la revista "L’EXPRESS" mos dize ke aunke ( despues ke la armada İsraelyana se travo de los territoryos okupados) los problemas de salud se topan debasho la responsavilidad de la Otoridad Palestinyana, el Ospital Hadassah se karga de la mitad del koste i la otra mitad es asumida por el Benevolato.
"Un chiko akto entre otros, sin ninguna valor politika" diran los septikos. En efekto, un akto ke va mas aya kel "razonamyento pragmatiko" ...akto ke vyene de la "intelijensya emosyonal", mas profonda en syertos kavzos ke la" intelijensya rasyonal i matematika", echa no solo de kalkolos sofistikados ma de sensivilidad i de komprensyon... la sola ke puedra permeter a personas tan diferentes las unas de las otras, de tener un dia la posivilidad de aserkarsen, malgrado sus diferensyas i sovre todo malgrado sus antagonizmo vyejo de mas de medyo siglo.
