Ma si demandash a los mansevos, esta imajen ke los publisitaryos keren krear no es real.
A lo ke estomos viendo, la manseves de oy esta mas inkyeta i mas pesimista ke la manseves de muestro tyempo. Vente anyos antes, kuando eskapavash la universita i teniyash una profesyon, todas las puertas eran avyertas para vozotros. Ma agora, un diploma solo no esta abastando. La teknolojiya avanso muy presto en los diez anyos pasados, i esta kontinuando a avansar kon una grande rapidez. La populasyon esta pujando de diya en diya. Por esta razon, los mansevos kale ke seyan mas ekipados afin de topar un buen echo. Problemas de eskola, famiya, amigos, echo, paz en el payis i en el mundo, populasyon, son solo unos kuantos de estos problemas por los kualos los mansevos deven de luchar.
El stres de kompetir kon otros i de ganar un buen lugar en los echos i en la sosyeta esta forsando munchos mansevos a retirarsen i a bivir en la soledad.
Este sentimyento de soledad los esta forsando a entrar en los "chat rooms" (kamaretas de konversasyones). Estas konversasyones entre los mansevos (ke son sinyales ke solo eyos entyenden), fueron una forma de terapiya para eyos. Oras i oras estan en sus kamaretas, komunikando kon otros mansevos de sus edad, i estan kompartyendo los mezmos problemas. Los mansevos de oy son la primera jenerasyon ke estan komunikando sin el kontakto de ojos.
Los padres i las madres de esta jenerasyon, ke son lo mas la jenerasyon de los sesentas (60’s) i de los setentas (70’s), se engrandesyeron kon reglas i kon otoritad severa. Eyos kijyeron ser libres, i por esta razon, munchos de entre eyos adoptaron la moda de los "hippis".
"Dar muncha libertad a sus kreaturas" fue la reaksyon a la otoridad de la kuala las madres i los padres sufriyeron en sus manseves. Ma, esta eksesiva libertad no fue muy buena por sus ijos. Puede ser ke el manko de otoritad fue el kavzo del "egoizmo" ke ay en la manseves de oy. La komunikasyon entre las doz jenerasyones esta reduzyendose den diya en diya.
La jenerasyon de los padres fue engrandesida kon los "izmos" komunizmo, nasyonalizmo, kapitalizmo etc. Eyoz teniyan un "ideal" una razon de luchar i una promesa de akomplir. Ma estos "izmos" falitaron kon tyempo; los lideres no puedyeron tener sus promesas, i por esta razon, los "idoles" de un tyempo disparesyeron. Oy, los mansevos no se estan kreyendo en dingun lider, en dinguna palavra. A lo ke estomos viyendo, oy el solo ideal es el "materyalizmo"; -tener todos los konfores i todos los luksos posibles.
Kon la invensyon de la televizyon, el mundo se enchikesyo; i maz no ay "kontentarse kon lo ke tyenes". Agora todos los mansevos keren todo lo ke ven, i lo keren obtener imediatamente, sin penar muncho, i kuando no lo pueden obtener, malorozamente la violensa, la depresyon, la dependensya a las drogas son los rezultados inevitavles para munchos.
El espanto i la deskonfiyensa en el futuro los esta aleshando mezmo del kazamyento. Eyos se estan espantando de no pueder topar las mezmas kondisyones ke tyenen en las kazas de sus padres. Oy, el anyo de maturidad se alargo fin trenta.
Esperamos ke esta jenerasyon se va konsentir de la insinyifikansya del materyalizmo, de las valores superfisyales, i vana "lavorar para ganar sufizante afin de ser orozo". Puede ser ke esta vez, los mansevos van a salir de sus kamaretas i de sus soledad, i van a bushkar la alegriya en valores mas profondas.
