Nişantaş, syempre fue i kontinuo a ser, el sentro elit de la sivdad. Konservo su nombradia de ser un distrikto rezidensyal, kon sus eskolas, bankas, marketes, antikaryos, galerias de arte, klinikas, espitales ets…Al lado de su kompozizyon historika, sosyal i kultural, de unos kuantos anyos para aki, Nişantaş tomo una mueva fama. Se izo sentro de moda,merkansiya, i tambyen, gastronomiko.Esta rika mozaika, lo aze un distrikto preferido de Estambol.
Oy, vamos avlar de un otro aspekto: de sus floristos…Asegun la deklarasyon de la Unyon de Floristos, el distrikto ande se vende lo mas demaziya flores ,es Nişantaş, djuntos kon Teşvikiye, i Şişli .Estos son los lugares los mas rikos en djeneros de flores. Es posivle de renkontrar un floristo en kada "köşe", no solo butikas, ma, tambyen floristos ambulanmtes.
Esta abundansa de flores fasilita el merkador, no tyene menester de bushkar muncho!…Ay una abundansa!No me esto podyendo impedir de pensar:"Es el amor de los moradores verso las flores, la razon de este estado, o ay otros faktores?"Para pueder responder a este djenero de kestyones, pozi syertas, a unos, doz floristos. En desparte, tengo meldado, en la revista"Nişantaş", unos kuantos paragrafos sovre este sujeto. Veremos kualo me va akodrar!…
A los floristos demandi, si reelmente, este sentro es el mas apropyado a la vendida de flores. Unos respondyeron afirmativamente, otros la kontra. Veremos:
"Fin antes 4LJ anyos, puedo afirmar ke era ansi. Ma, aktualmente, muestro kuartyer se izo un sentro komersyal, magazenes i buros. Pyedrimos munchos de muestros klientes ansyanos, ke se fueron a morar a otros lugares. No estamos vyendo komo antes, akeyos sinyores i sinyoras".
Ay otros floristos ke estan pensando la kontra:"Oy en diya, ay un grupo bastante grande, de alto nivel de revenido, kontinuando a bivir aki. Estas personas no abandonaron la uzansa i amor de las flores. De este punto de vista, Nişantaş, es un kuartyer mazalozo."
Otro un floristo, optimisto, adjusto:"En desparte de los moradores, ke, en jeneral, les plaze merkar flores, en muestro sentro, ay una muchedumbre de espitales. Esto es un fakto ke aze aumentar la vendida. Naturalmente, el estado finansyal del kliente djuga un rolo importante, i Nişantaş, es bastante satisfezyente para mozotros."
Munchos floristos,(no kero dar nombre por no entrar a la reklama) estan tomando komanda ON-LINE, sovre el internet. Estan podyendo , afilu, amostrar en el ekran, la preparasyon de la komanda ke resivyeron. En estos sitios, se puede tomar todo modo de informasyon sovre las flores i sus proteksyon.
Mezmo si syertos floristos estan keshozos, en vyendo sus shifro en el distrikto, se entyende el amor de los moradores por las flores.Ma, en todo kavzo, el grande shifro de floristos, esta ensima del menester. İ, esto, por seguro ke puede kavzar problemas, del punto de vista de eyos.
Keridos amigos i lektores, djuntos kon estas flores, vos esto mandando todos mis sinseros suetos para una buena anyada.
