Klara PERAHYA
En este empesijo de anyada mueva, la persona no se puede detener de pensar sovre lo ke fue el pasado, lo ke es el Prezente i lo ke sera el Futuro... analiz "objektiva" o, puede ser, en toda sinseridad subjektiva ... no se ...Ay momentos ande los grandes problemas ke markaron muestra vida suven del fondo de muestra memorya asta este espasyo supozado ser klaro ke yamamos " konsensya"....asta ke grado muestros rekordos son verdaderos sin ser idealizados o dramatizados ? evenementos orozos, evenementos malorozos, faltas ke izimos por segura sin pensar, por no saver, por no aver entendido lo ke oy en dia mos parese ser evidente.
Afuera raros prinsipyos fundamentales ke testigan de muestra umanidad, todo parese trokar de un dia al otro, todo parese ser instavle i ambivalente ...Esto es un tema ke munchas vezes me persige, "el doble kontenido de kada koza" ...raramente todos los dos son pozitivos o todos los dos negativos ...la mas parte del tyempo el uno es pozitivo i el otro negativo, komo si nada puede ser enteramente klaro o enteramente oskuro, komo si todo tyene dos fachas.
Es un fakto ke la mizma koza no tyene el mizmo aspekto para todos... se puede tambyen dezir ke no tyene syempre el mizmo aspekto para la mizma persona, a diferentes momentos... Es puede ser de aya ke vyene esta anksyedad mizmo en los momentos de grande felisita , komo un espanto loko de lo ke puedra afitar .
Lo ke ayer mos paresia tener una importansa primordyal pyedre su intensidad kon los dias... muestra mirada troka, devyene envezes mas aguda o mas induljente, kargada de eksperyensas muevas... un evenemento no reprezenta solo el akontesimyento ke lo provoko , ma tambyen muestra manera de verlo , de sentirlo ..de djuzgarlo..
"Verdad de una parte de la montanya , mentira de la otra" disho el savyo Fransez ...tenemos la tentasyon de adjustar "verdad ayer, dubyo oy" ...lo ke ayer mos paresia ser irrefutavle pyedre su absoluto mizmo si no tenemos nada en mano para remplasarlo.
La sensya evoluo desde un siglo kon una prestor vertijinoza ma no el ombre en su valor de umano, el dubyo esta ainda en kada uno de entre mozotros, puedeser mizmo mas lansinante ke al tyempo...la vida de kada dia se izo inkontestavlemente mas fasil , las distansyas jeografikas mas kurtas.. todo lo ke mos paresia imposivle de alkansar mos es mas o menos aksesivle... ma la luz no remplaso enteramente las tinyevlas... la vida devino una perpetual bushkida de valores ke daran un senso a las kozas.
