Hanuka se fyesto este anyo en la Unyon i la Solidaridad. El 27 Desiembre, tadre de Martes, en 20 diferentes lugares del mundo, las kandelas de la tresera noche de Hanuka fueron asendidas a la mizma ora, i la vizyon de este maraviyozo adjuntamyento fue reflektado en Yerushalayim, sovre un immenso ekran, delantre el Kotel Maaravi.
Hanuka simbolizo syempre la Klaredad; oy en dia, simboliza tambyen la "Komunyon", la lucha (todos endjuntos, mano kon mano) kontra las tinyevlas i la inimistad.
Una muy ermoza interpretasyon de la fyesta de Hanuka, es la sigiente:
"Las luzes de Hanuka simbolizan la LUZ ESPİRİTUAL ke mos alumbra i ke deve tambyen alumbrar los otros. Es la razon por la kuala las Menoras asendidas deven ser pozadas lo mas serka posivle de las ventanas afin ke los ke pasan por la kaye puedan tambyen verlas".
Desde los primeros tyempos del judaizmo, el prinsipyo de la komunikasyon
fue prezente en muestra ley... el Monoteizmo fue revelado al puevlo Judyo no unikamente para el solo, ma para ser tambyen transmetido a los otros puevlos.
Munchas vezes mos demandamos kuala puede ser la razon de la perenidad del puevlo Judyo... la unyon entre sus myembros por seguro, ma tambyen probavlemente, esta voluntad de transmisyon, esta konstante avyertura a los otros.
