"Ke se puede azer para impedir el moral de kayer a zero, o, de no ser triste?" Yo, no syendo la espesyalista de este djenero de preguntas, lo topi mas djusto de demandar a un profesyonal, ke respondyo ansi:
"Azed la prova de kitar el enventaryo de todas las hazinuras ke NO TENESH…Sin eskapar la lista, puedesh dezirvos: "reelmente so orozo!"…La alegria interyora ke vaj a sentir, es una fuersa pozitiva. Vuestro karakter va ser mas alegre, i sin esforso,vaj a ser amavle kon el derredor."
En verdad, muy enteresante, la repuesta del espesyalisto!…Ma, esto pensando ke es un poko difisil de pareser kontinualmente de buena umor. En el presipyo es ansi, ma, kon tyempo, muestro komporto influensa el moral, i puedemos, reelmente ser de buena umor. Es, mas o menos, el egzersisyo ke konsiste a sonreirse enfrente el espejo, pensando kozas ermozas. No se si lo konosej, este metodo?! En algun artikolo futuro, puede ser ke lo ekspliko a los lektores!…
Para pueder deskuvrir los miles detalyos agradavles de la vida, kale, antes de todo, estar dezeozos de bushkarlos. Es una manera de ser menos triste. Ay i otros kaminos ke provi personalmente. Vos konsejo de frekuentar las personas ke tyenen una vizyon favoravle a vuestra konsepsyon de la vida. Las otras personas?…Las puedesh evitar por un syerto tyempo! Si es imposivle, aprova se serrarvos los oyidos, (lo ke no es syempre etik). Alora, azed la prova de TRESLADAR en un linguaje "roz," las palavras pretas o grizas de.estas personas. Esto, vos permetera de kedar syempre, lo ke sosh, optimisto i tenyendo kreensa en la vida i reushita.
Avra djente ke diran" la vida es vana!"…La realidad es, ke en el fondo, son personas "agreadas", ke no podyeron realizar sus dezeos. Naturalmente, no esto kritikandolas. Pueden tener reel problemas, ken save? Ma, ya se ke ay un djenero, ke se syenten kontentes en deskorajando el de enfrente, o toman plazer de sus desepsyones. Aki, entra i una doza de selo. Estad seguros keridos lektores, ke es la eksperyensa ke esta avlando…
No se si konosej talas personas. En kavzo de si, alora devesh absolutamente trokar sus propozitos a vuestra manera. Komo? Por egzempyo, si dizen "la vida es kurta, o, el sol un diya va espareser!", de vista puedesh tresladar ansi:" La vida es kurta, es verdad. Devo bivirla lo mas mijor posivle.Vinyendo al sol, ya es verdad ke su diametro amengua, no se kuantos milimos en sinko mil! anyos, lo ke no deranja mis proyektos!…"
La sola manera de tomar lo maksimum de la vida, es saver ke no devemos malgastarla. Otro modo dizyendo, no ay muncho tyempo de pyedrer, en bavajadas. Kualas ke seyan las deziluzyones de ayer, oy, tenesh muevas esperansas. O, kualas ke seyan las difikultades de oy, devesh estar prontos a venserlas. No permetesh a los evenimyentos penivles(en la mezura del posivle), a los problemas, de impedir las posivilidades del diya prezente.
Estas difikultades se pueden konsiderar komo eksperyensas, lisyones profitavles, i es en konosyendo los kavzos, ke me esto permetyendo de dar estos konsejos. Es, alora ke se puede tomar plazer de la vida, i bivirla. Aki kero transmeter un mesaje anonimo, ke meldi en el Internet: "Syendo un miembro de la populasyon aedada, oy demanyana, me senti feliche de pueder alevantarme de la kama…Kontente de tener un techo sovre mi kavesa…Kontente de pueder meldar mi primer e-mail del diya… Kontente de ser kapavle de emplear el klavyede mi komputadera (bilgisayar)…"
Keridos lektores, estas frazas de arriva, no son miyas, ma, de una persona de 82 anyos…No se si ay menester de komento…Kada akto muestro toma el karakter de la umor ke tenemos kuando los kumplimos. En vyendo una redoma a medya yena, yo so de los ke pensan:"Oh!, maraviya, dayinda ay otra medya"…
Kero eskapar este artikolo, kon una dicha de Oscar Wilde "BIVIR, es lo ke se ve muy ralo en el mundo…La majorita de las personas, estan EGZİSTYENDO, solamente, ma, no BIVYENDO"…
