Enorme en su estatura fizika komo politika, korajozo, dedikado integralmente a su puevlo, aunke munchas vezes pronto a ir kontra las leyes de su propyo payis, eksesivo en su patriotizmo, multiple en su ser , polivalente i ambivalente a la vez....brutal i karismatiko, soldado inkomparavle al servisyo de un ideal ansestral, i en mizmo tyempo, (estos dos ultimos anyos) uno de los "Ombres de Estado" los mas realistos i los mas pragmatikos...
El eskritor Amos Oz, uno de sus muy fuertes antagonistos, ko-fundador del movimyento "Shalom Ahshav"(La paz Agora) dize lo sigyente a su sujeto.
(adaptado del fransez) "Sharon bivyo kaji syempre komo un soldado de la epoka Biblika. Adolesente, el avia empesado a defender su propyo kazal afin de arrondjar los enemigos ke lo atakavan..........
Durante anyos i anyos tuve un terrivle resentimyente kontra Sharon. El simbolizava para mi todo lo ke yo aborresia en mi payis: "la violensya" ," una meskla de brutalidad i de oto-adjideamyento" ets.. i agora, desde dos anyos, estamos asistyendo a una sorprendente transformasyon.
Sharon troko de un dia al otro . Kuando ( ay de esto dos anyos) el disho:"la okupasyon es una katastrofa", kuando el avlo de "dos Estados para dos puevlos" , kuando el anunsyo" ke iva evakuar Gaza", me paresyo ke no era la verdad, ke era una finta, ma "el lo izo". (fin de sitasyon)
De su parte,el historyano Elie Barnavi, ambasador byen konosido de Israel en Fransya entre los anyos 2000, eskrive ansi:
(adaptado del fransez) "...se topa dos ombres diferentes en Sharon, el uno brutal i olvidozo de las leyes, el otro karismatiko...el uno incho los territoryos okupados de kolonias Israelyanas i derroko las infra-estrukturas palestinyanas, el otro tomo la desizyon de retirarse kompletamente de Gaza, dando ansi por la primera vez la independensya al puevlo Palestinyano.....Sharon fue un ombre terrivlemente kritikado no solo por los ajenos ma por los suyos mizmos , destituido de su posto de ministro de la Defensya por una instansya judisyar de su propyo payis i portanto unas kuantas dekadas mas tadre, el fue nominado " primer ministro." (fin de sitasyon)
Ke imajen va guadrar la istorya de el? La del soldado? o byen la del pasifikador?
La del " Ekstremisto en su voluntad de servir su puevle"? o la del " fundador del partido KADİMA" en su kudyo de aserkar (en la mezura ke es posivle) los partidos de la "Derecha" i " de la "Syedra" ?
Aunke nasyonalisto asta el sevo de sus guesos, Sharon acheto de render Gaza, i puede ser estava pronto a ir mas leshos, su suksesor va inevitavlemente enkontrar difikultades duras a venser.
En su artikolo a este sujeto publikado en el kotidyano LE MONDE del 10/1, Jean Allouche mos dize lo sigyente:
(adaptado del fransez ) "Todo komo el ombre de la kaye ke dize ke "La vida deve kontinuar", Ehud Olmert el suksesor provizoryo de Sharon ya tomo las kozas en mano afin de kumplir su funksyon de "Primer Ministro tenyente" . Alhad el 8 /1/2006 el prezidyo el primer "Konsilyo Ministrial" .
Grave, penseryozo, Ehud Olmert avyo la seduta semanal del Kabineto Israelyano".Al entorno de el ,los myembros del governo en su totalidad, Shimon Perez, el Kapo de la Armada i el Direktor del Servisyo de Seguridad. A su syedra un fotolyo vaziyo, el de Sharon. El simbolo era sinyifikativo i afirmava su voluntad de sigir el mizmo kamino ke su predesesor.
El primer ministro tenyente se engajo ansi a enkavesar por 100 dias el mekanizmo Governomental. El empeso su primer diskorso de sirkunstansya kon estas palavras: "Estos de alkavo dias, toda muestra atensyon es konsentrada sovre lo ke se esta pasando aryento del Hospital Hadasa . Si puediamos komunikar kon Sharon i ekspresarle muestros sentimyentos, savesh lo ke el mos iva responder :" Vos rengrasyo por vuestro kudyo, ma metevos al lavoro, agora es el momento de sigir los problemas del Estado, la sekuridad del puevlo, la situasyon ekonomika ets... i es egzaktamente esto ke vamos azer. Israel es una demokrasia fuerte i rezya, sus institusyones funksyonan bueno, devemos de tomar las kozas en mano". (fin de sitasyon)
Segun lo ke Jean Allouche adjusto, Olmert tuvo una grande influensa sovre Sharon en favor de un retiro unilateral de Gaza, el es mizmo favoravle a un syerto partaje de Yerushalayim .
Sharon kijo syempre ir mas leshos ke la situasyon prezente,sovre todo mas leshos ke su espanto. Agila dezeoza de bolar en un eternal espasyo de libertad, el fue malorozamente vensido por su propyo puerpo; el kayo esklavo de su propya sangre...
Una koza es kaji segura , mizmo si la persona desparese, su ovra kedara.
