Klara PERAHYAKaji kada dia en los grandes periodikos de los payizes evropeos son prezentes tres titolos: "Sharon ", "Kadima" , "Ehud Olmert" , kuando de otra parte , en una kamareta de ospital, un ombre lucha ainda por su vida despues kaji 15 dias de kompleta inkonsensya, un ombre solo delantre la muerte komo son todos los mortales, uno de los mas kritikados i en mizmo tyempo uno de los mas irremplasavles.
Coya DELEVİ
El profeta Elıau Anavı i su dishiplo, kaminando a traverso el pais de Israel…Estan perkurando de azer achetar la egzistensya de un uniko KRIADOR, a los ke estan en idolatria…Ven en un kampo,un ombre lavorando la tyerra ,kontinualmente murmureando i chapteando las vakas.Ni la komida, ni el vino ke le trusheron su madre i su mujer,no aviyan reushido a meterlo de buena umor. Elıau, ke dezde un momento lo estava observando, le demando:"Porke tala mutra? Tyenes una famiya kerensyoza i la komida no te manka.Porke no estas orozo?"
"Komo puedo estar, syendo ke so ovligado de lavorar diya entero, kuando otros biven gozando de la vıda? .Maldicho seya el momento kuando muestros primeros avuelos gostaron el fruto defendido.Adam .no iva sintir a Hava, i entonses,no ivamos ser arrondjados del GAANEDEN.Yo al lugar de Adam,no iva sintir mi mujer."
I en esto, la mujer del agrikultor, adjusto ke eya nunka se deshariya sombeyar por nada, komo fue Hava por la kulevra. A su torno, la madre tomo la palavra:
"Estash avlando komo doz inyorentes.No ay sovre la tyerra, una persona ke no peko.i vozotros tambyen, vos ivaj a komportar de la mezma manera, si la okazyon se prezentava. No devesh kritikar la djente."
Elıau, en silensyo, sintyo la nikochera i le dısho:"Djuzgates kon induljensya la flakeza umana, i, aprovechandote de tus eksperyensas. I eyos tambyen van a tener okazyon de provar si son kapavles de rezistir a kualkyer sombayimyento." I se alesho, djuntos kon su dishiplo.
Despues de un momento de kayades, la madre disho ke el ajeno deviya ser un savyo, i no un simple mortal. El ijo respondyo kon ironiya, ke era porke la alavo ke estava pensando esta manera, i adjusto ke el ajeno no teniya derecho de djuzgarlos.La madre disho a su ijo de kalmarse: "El ombre por seguro no teniya negra entisyon. A la kontra es un buen amigo, syendo ke mos izo konoser muestras faltas."El ijo no respondyo,empeso a lavorar kon mas muncha sanya .Apenas empeso a kavakar, vido una kashika de fyerro, i otra una, i otra una, tresera.Yamo a las dos damas ke ya estavan empesando a aleshesarsen. Les amostro lo ke topo. Kon dfikulta, meldo ensima la primera kashika:"LA PERSONA KE ME VA AVRIR, VA SER RIKA"
Alora, la madre repeto ke el ajeno era un embiyado de los sielos, para darles muncho bueno,i seguro aviya un trezoro ayi. El arador avyo la kasha i se eksklamo:"Mirad las piesas de plata!..Es el Sielo ke mos mando esta rikeza! Madre el ajeno era un azardo i nada mas. Me va azer una ermoza kazika, merkar un esklavo i va bivir sin ansya."
"I Yo,"disho su mujer, "Kero ermozas vestimyentas i una esklava."
Tomando la segunda kashika, mas pezgada ke la primera, meldaron:"SI PENSAS KE EL ORO TE DARA FELISIDAD, AVRE ESTA KASHA."Ke pregunta!.Seguro ke va ser muy riko, poderozo i orozo!"disho el mansevo, a kualo le respondyo la madre:
"Ijo, no pensas ke la salud es un trezoro grande? A kualo syerve la rikeza si no tenemos sanadad i alegria ?"…
El ijo no respondyo, avyo la segunda kasha, i enduna, la nikochera vido sus ijos echando gritos, baylando komo los lokos, a la vista de los oros. Kon grande esforso, reusho a kalmarlos.
(Fin de la primera partida)
