Dora NİYEGOEn el simposio Internasyonal "Primer Enkuentro Historiko-Kultural Hispano-Turko-Sefaradi" ke fue organizado en la Universidad de Ankara en data del 28-30 Noviembre, sientifikos i investigadores de la Amerika del Norte i del Sud, de la Evropa, i de Israel prezantaron konferensyas sovre la lingua i la istoria de los djudyos sefaradis.
Klara PERAHYA
La semana pasada uvo en la televizyon Franseza un debate entre historyanos i juristos, konsernando el rolo de kada una de estas dos disiplinas en la transmisyon de los akontesimyentos a la posteridad...
Uno de los partisipantes espesifiko kel dover del historyano es de transmeter los evenementos tal ke se pasan, en toda sus realidad, lo ke demanda por seguro investigasyones metikulozas i una analiz minusyoza de las razones ke pudyeron provokarlos komo de las konsekuensas ke puedran rezultar.
El rolo del juristo es, de su parte, de pronunsyar un djuzgamyento normativo de valor sovre el kontenido moral del kavzo.
Es klaro kel primer defende la realidad en su verdad la mas absoluta i se interesa sovre todo a las konsekuensas sosyo-politikas del kavzo, kuando el segundo, todo en respektando la realidad, tyene el kudyo de djuzgar las implikasyones etikas.
Varyos faktos fueron dados en egzempyo, entre otros el" nazizmo" en su kontenido i sus konsekuensas funebres i aktualmente el problema del negasyonizmo ke nyega enteramente la otentisidad de la Shoa, aunke testigos vizuales biven ainda.
Despues de una semejante emisyon, la persona no puede detenerse de pensar a lo ke sera la vizyon de la Shoa verso la fin del 21em (venteiunyem) siglo, i en el futuro.
Asta ke grado un historyano puedra transmeter la desgrasya de una semejante trajedia? Es ke el puedra komunikar la terrivle sufriensa ke fue la de muestros ermanos? sus espanto ? sus soledad? el dezespero de la madre ke ve su ıjo embiado sin razon a la muerte? el ultimo yoro del ninyo arrankado salvajamente a la vida? la kanserya del vyejo, abatido i en estado de perpetual desmamparo?
Es ke ay palavras para ekspresar esto? İ mizmo si egzistaran, eske eyas tyenen egzaktamente el mizmo senso, la mizma valor o la mizma intensidad para todos?
Imajinaremos un historyano delantre una oja de papel el esprito yeno de argumentos ke el kere ekspresar... los byervos estan aya, prontos, ma kualos eskojer? Kualos puedran traduzir lo mijor lo ke es urjente de dezir?
Es ke la konsensya de esta horrivle trajedia ke amargo milyones de personas pudo umanizar el ombre ?
No se... Ainda oy en dia , komo una terrivle negasyon de todo modo de esperansa, kapos de dos estados (todos los dos eredadores de vyejas sivilizasyones) gritaron sus aborresimyento enverso un chiko payis de sinko milyones de personas, i sus dezeo de anihilasyon.
Muestro mundo es inkomprensivle, paradoksal... de una parte en los laboratoryos , mujeres i ombres de sensya bushkando de dia i de noche remedyos para venser la muerte i la sufriensa, i de la otra, al nombre del Dyo i de sus prinsipyos sakros, ombres de Estado, eskojidos por el puevlo,pushando el odyo asta pronunsyar palavras de muerte...
En mi esprito un estranyo sentimyento de dubyo, ma komo un rayo de luz, sovre mi meza de lavoro una nota, tres paragrafes tomados del kotidyano "Le Monde" ke mos ambezan el konsideravle amenguamyento en Fransya, de los aktos rasistos i antisemites.
Tambyen sovre mi meza, un livro yeno de kolores... el rekolyo de las pinturas ke figuraron en la retrospektiva de muestra amiga Esti Saul... desenes de flores de una fineza kaji espiritual, karas de ninyos en sus inosensya inegalavle i mas leshos formas muevas, kolores briyantes komo un dezeo de afirmasyon.
Una retrospektiva tyene ,a mi pareser, dos valores diferentes... byen entendido la valor artistika i tambyen la vizyon de una evolusyon, del movimyento de un esprito en su bushkida de linyas i simboles deskonosidos...
Ay ainda tantas kozas a deskuvrir en muestro vyejo mundo!
