Picasso nasyo en 1881 en Espanya. Su padre era un pintor non famozo. Deskuvyendo el talento de su ijo lo enkorajo a pintar. Estudyo en primero en la eskola de arte de Barcelona ande enkanto sus profesores kon su kapachita. Dospuez en la akademiya San Fernando de Madrid. A 16 anyos estava pintando los famozos tablos de los maestros de la Renesans. Su padre le sirvyo de model por el tablo"sensya i pieta". Su nombre de famiya era Ruiz, ma el prefero utilizar Picasso, el nombre de famiya de su madre. En 1900 se enstalo a Paris. Dospuez un anyo en la primera ekspozisyon travo la atensyon de los kritikos de arto.Enfluansado por la muerte de su amigo Casagemas, de 1901 a 1904 la kolor prensipal en sus pinturas es el blu.De 1904 a 1906 es la perioda roz o la perioda de Cirko. Su eskopo era de trayer una revolusyon al arto; de trokar enteramente lo ke anbezan en la akademiya. En 1908 pinto en el stil kübik. En 1920 pinto a su mujer i kreatura enfluansado por los artistes klasikos del 16en siglo. Aparte de pinturas izo munchas statuas i seramikas. En sus pinturas se observa la tristeza de las dos gerras mondiales, las kolores son sombras. Dospuez de la sigunda gerra, en enverano morava en el sud de la Fransa. Las kolores son bivas i allegres. El pinta a sus ijos i mujer, la vida de kada diya. En un inerview el disho" los otros eskriven sus estoryas de vida; yo pinto" (Edward Quinn 1987).
La ekspozisyon de picasso se puede vijitar en el museo de Sak_p Sabanc_ fista el 26 Marso. La organizasyon es ekselente. El eskopo son las kreaturas. Para las kreaturas mankos de 14 anyos la entrada es sin pagar. 26 tablos son eksplikados por audoguide. Komo un telefon onde en eskrivyendo el numero del tablo da la eksplikasyon. Fista oy 45 mil personas lo vijitaron; se aspera ke este montante seya 150 mil personas fista la fin de la ekspozisyon.
