Tantos problemas, ansyas ko no se estan reglando, muncha pena, ojos ke yoran, por tanto a la djente les paresen ke todo esta kaminando bien, no ay durmir, kuentos i kuentos i mas kuentos, ya se aprovo de modos a maneras. Se deve de akseptar ke la situasion esta mala. Ke se aze? Mijor es ir ande la Doktora Nita Scherler. Es psikolog i ya savemos ke no es menester de ser hazina para ir ande la Dr. Nita.
De una manera simple, kon munchos egzemplos, la avla muy biva, es la manera de avlar del Doç. Hanna Nita Scherler. Dr. Nita avla klaro, i da a entender kon muncho entendimiento, kon transparensia, sin deshar dubio de nada. Las personas ke la oyen se les repoza la alma, porke todo gana su klaredad. Eya es kompetente en su soceto.
Le estomos demandando i keremos la repuesta, todos mozos, los sanos i los hazinos i los ke le sparesen ke son hazinos. Dr. Hanna Nita responde tandis ke mozos mos apuramos: "Kualo va responder agora…" . Portante eya responde de una manera ke kontenta a la odiansa.
Estomos todos penando kon el/los de kaza.. Sera ke va aver pleto, O si no ay pleto todo se pasa a las kayadas komo si fuera un "salyangoz" danjorozo.
Mujeres, ombres,… estomos en frente de Doç.Dr. Hanna Nita Scherler, Kada persona esta ekspozando so kavzo ke no parese a ningun otro. Estomos avlando i Dr: Nita mos esta oyendo. Ya estomos repozando, solo en avlando ya estomos repozandomos. Los de kaza no mos estan entendiendo, a mozos a las mujeres de kaza. Tenemos tanta djente de dar a entender: marido, kreatura, esfuegra, kunyada, etc. Ya savemos ke kuando mos kazamos, mos kazamos i kon la famiya del marida, bien ke ay siertos maridos ke akseptan esta kundukta porke se espantan de sus mujeres. Estomos gerreyando, estomos eksplikando, de vezes parvinimos, de vezes no parvinimos, engrutimos komo si fuera eskupitina. Kazar es, ay de travar., Ay las tradisiones, ay las hazinuras en siertas famiyas ke se propajan a las kreaturas.. Mozos keremos solo lo bueno, las ermozuras, ermoza nariz, tayla delgada,… ma viene i lo ke no keremos. Esto es la hereditad.
Esto todo es por dizir ke a la Dr. Hanna Nita la tenemos menester. Orozamente ke ya esta, i puedremos ir a demandar, a sanarmos, a konsultarla en sanedad mizmo. Orozamente ke esta Doç.Dr. Hanna Nita scherler.
