Rav Yeuda ADONİYitro esfuegro de Moşe Rabenu, tuvyendo avizo de todo lo ke paso dizde ke salyo Yisrael del ejipto, i todos los miraglos ke izo el kriyador a los cudyos mezo de Moşe Rabenu, tomo a Tsipora su ija mujer de Moşe Rabenu i sus dos ijos Gerşon i Eliezer i se fue a el dizyerto al Monte de Sinay por verlo a Moşe i alegrarsen kon el i saver todos los pasajes.
Arivando al Monte de Horev, mando avizarle a Moşe Rabenu su vinida tuvyendo Moşe Rabenu avizo de la vinida de su suegro, salyo de Refidim a su eskontro el i todos los grandes personajes de İsrael. Los resivyo kon grande respekto le izo las onores menesterozas. Le konto todos los pasajes disde el diya ke se espartyo de el fin este diya.
Yitro se alegro munço de sintir i bendişo a el Kriyador en rekonosyendolo por sinyor de todo el mundo. Resivyo sovre si, de kreer en el solamente i guadrar sus enkomendansas i kedo en el dizyerto kon Moşe Rabenu. De todas las gloryas i miraklos ke vido el puevlo de İsrael disde ke enpeso de ser amado de Dyos. La mos alta i enşalşada glorya fue la resividura de la ley santa. En Monte de Sinay. La kuala es un pasaje muy seryozo i muy enportante en la estorya del puevlo Cudyo.
Despues de un mez i medyo ke salyeron İsrael de Ejipto en el primo diya del mez de Sivan portyeron de refidim i arivaron a el dizyerto de Sinay. En el monte deklaro el todo poderozo a el puevlo cudyo mezo Moşe Rabenu ke el kriyador eskojo en este puevlo por trezoro. Vozotros vitej muy byen dize el Kriyador lo ke izo a los Ejipsyanos i komo vos truşe asta aki. Kon munça siguridad en las alas de las agilas. Si vozotros keres ovedeser, mis ordenes i konservar mi firmamyento, de ser mi puevlo fidel sereş muy keridos akondisyon ke devej ser una nasyon de Koanim sirvitores de dyos i un puevlo santo. Sintyendo estas palavras el puevlo, de boka de Moşe Rabenu respondyeron todos a una mente kon un grande entusyasmo todo lo ke mas enkomenda el kriyador vamo a ovedeser.
El diya de 6 Sivan se enpeso a sintir unas bozes de trueles i relampagos, una boz de Şofar muy temeroza una nuve kuvriya al monte. Todo el puevlo se estremesyeron.
Estonses oyo todo el puevlo una boz muy temeroza afuera de la natura, los dyes komandamyentos “Aseret adiborot” los kualos son las bazas de muestra santa relijyon.
