MALENTENDIDO!!…
Yo, syempre tengo en un kavanoz kayısı seko. Es savrozo i provechozo para la salud. Mos plaze komer unos, doz deyos la demanyana. I,en jeneral, adjustamos doz, tres gajikos de muez, es delisyozo!…Bueno, vaj a dezir, deke me meti a azer la reklama del "kayısı?". No tengo este modo de entisyon. Solamente, kero eksplikarlo kon la savor de una anekdota. (si lo puedo reushir!). Era en uno de los primeros diyas, del reselo unanimo, sovre la "grip de pasharo." Yo, ya aviya empesado azer lista de lo ke puedemos! gizar i komer!…Por ovligasyon, mos vamos azer "vejeteryen," pensi. Porke, i karne, kaji ke no entra a mi kaza, (o muy ralamente) desde unos, kuantos anyos.
Me izo telefon una amiga, dizyendo ke meldo en el jurnal "M..,"komo el GUEVO, i el KAYISI tambyen, es danjerozo. Syendo un jurnal bastante seryozo, lo tomi en konsiderasyon. Portanto, tuve syertos dubyos, en grado de "protesto!"…Ya entyendo!, el guevo es sekanozo, ma, el kayısı,"ne bela!!?,"me estuve dizyendo de mi para mi!…
Todo en murmureando, tomi los kayısıs luzyoz, kolor de keribar!, i los meti en agua, los lavi, (i antes de komerlos, uzo a lavarlos) los ize komposto. Sali a emplear, entremyentes, merki el jurnal "M.." Kualo meldo en la primera oja, djusto ensima el manshet?…Egzaktamente esto:
"No komaj "KAYISI YUMURTA"!!Por seguro, ke todos saven lo ke kere dezir, guevo echo "kayısı." El ke no save, le rogo ke tome la pena de demandar a alguno! Aki es largo de eksplikar…En meldando lo de arriva, a mi marido i a mi, mos toma una riza inkontrolavle. Lo ke pude dezir fue: "Pekado a los kayısıs ke kozi." Este pasaje, parese mas muncho, a una shaka de 1 Avril. Ma, no es shaka, es otantik…
***
La fraza final de una anekdota es importante. Le da fuersa, lo ke en Turko, se yama "vurgu". Byen entendido, ay menester de una kapachita espesyal, en la manera de kontar tambyen. Yo, puedo no tener este dono, ma, no es importante. No va kontar, solamente eskrivir doz anekdotas ke sinti en la T.V. Espero de akodrarmelas sin falso…
***
Un chiko esta lavorando a su lisyon. Las preguntas syendo muy difisil, penso demandar a su padre:"Papa, ken es el primer prezidente de los Estados Unidos?"
"No lo konosko!"
"Papa, komo se yama la kaza del prezidente de los Estados Unidos?"
"No me lo disho!"
"Papa, en ke anyo Kristof Kolomb deskuvriyo la Amerika?"
"No me akodro!"
La kriatura, enkantada, no save ke azer, i le demanda al padre:"Papa, parese ke te enfasyi kon mis demandas." A kualo el sinyor responde:
"Ke kijo dezir ijo miyo?…Seguro ke me vas a demandar. Si no me demandas, komo te vas embezar?!!!".
***
I, aki, otra una …Un aedado delantre de una makina A.T.M. Kere echar paras. Esta penando, ma, sin rezultado. Se aserka un mansevo, i le demanda:"Sinyor, ke se pasa?"
"Ah!, kero echar estas paras a mi kuento."
"I bueno, ke karar?"
"Solamente 100 liras muevas."
"Ke azardo! I, yo kero travar 100 liras de mi kuento. Ni tu penes a echarlas, ni yo a travarlas. Me das a mi estas 100 liras, i te vas en la buena ora!"…
El nikochiri da la moneda al mansevo, i se alesha, orozo de aver solvido este problema!!!..
