"El 250en aniversaryo de nasimyento de Mozart", muzisyano sublime, riko en su diversidad i multiple en su ovra immortal ...muzisyano de una grande pureza i tambyen el sentenaryo del nasimyento de Emmanuel Levinas uno de los mas grandes pensadores de muestro tyempo al nivel universal.
Vyernes resivi un golpe de telefon del uno de muestros primo-editoryalistos "Ivo Molinas" envitandome a su konferensya sovre Albert Einstein , invitasyon ke me toko muncho i por lakuala lo rengrasyo de alma i korason. A propozito de esta konferensya, devo dezir, ke oyi avlar a su sujeto de una manera unanimamente admirativa. Segun todos los ke la oyeron, eya es un reel evenemento kultural.
Komo lo azemos kaji kada vez ke tengo la okazyon de enkontrar Ivo Molinas , i esta vez tambyen, referandome a su artikolo publikado en el SALOM de la semana pasada, avlimos de Emmanuel Levinas.
Estranya koinsidensya, el mizmo dia, Vyernes oras de tadre, en dos emisyones de la Televizyon Franseza ("C’est dans l’air" del posto <France 5> i "Biblitheque Medecis" del posto <La Chaine Parlementaire> ) se avlo en la primera de "Mozart" i en la segunda de "Emanuel Levinas".
Es un omenaje unanimo kel mundo entero esta rendyendo estos dias al grande kompozitor Austriako... Milyones de diskos se estan vendyendo en multiples payizes del mundo, diversos objektos de vestimyenta o otros, i mizmo produktos de komer komo patiseria o sosisones son fabrikados reprezentando su imajen.... un reel fenomeno de enfokamyento (odaklama) en syertos kavzos inkonsyente.
El omenaje rezervado a Emmanuel Levinas es por seguro muncho mas diskreto ..ma muy profondo...İvo Molinos i tambyen yo mizma tenemos en diversas sirkunstasyas, tokado este sujeto ekstremamente difisil.
Aunke no tengo personalmente la kompetensya nesesarya para analizar la ovra de un tal Pensador , bazandome sovre los komentaryos ke meldi a su sujeto, puedo afirmar ke el simbolo el mas fuerte de la filozofia de Levinas es antes de todo su "Humanizmo", ke el prezenta kon la afirmasyon de "la prezensya de Dyo" en la kara de muestros proksimos, en la kara del "Otro"...un humanizmo ke va mas leshos kel dialogo kon el "otro" i ke mos ovliga a sentirmos syempre devdor enverso el , i a asumir la responsavilidad de su "ser"sin nada asperar en retorno, de una manera absolutamente asimetrika.. .
En una eskrita malorozamente sin sinyatura , ke topi en el sityo elektronilo "Espacethique" meldi lo sigyente ke vos transmeto despues traduksyon :
"El Otro es <Kara> no en el senso de una kara ke se ve , de una kara ke se puede fiksar en una fotografia o en muestra memorya...ma <ekspresyon>, <palavra> ...Kara ke es, desde el empesijo, <demanda>, <suplikasyon>, <komandamyento>, <ensenyansa>... Kara ke egzija repuesta, ayudo, solisitud i kompasyon. Es ansi ke parvenemos al termino el mas utilizado por Levinas ."la responsavilidad enverso el otro."
"Mozart" ,"Levinas" el arte i la filozofia, kada uno en la ondura de su ekspresyon, kon el poder ke tyenen ,el uno de ser para mozotros un refujyo , el otro de aklararmos i giarmos ....dos kriansas immortales ke ainda mos mostran el kamino a sigir.
