"Yo," disho el uno, "eskometo ke le va azer pyedrer pasensya."
"I, yo," disho el otro, "eskometo ke no vaz a pueder."
El primer, dechidado a egzekutir su proyekto, eskojyo espesyalmente una tadrada de vyernez. Saviya muy byen ke Hillel, era partikolaramente okupado kon aparejos de Yom Shabbat. El Rabino sintyo sonar a su puerta, i una boz dezagradavle gritando:
"Es ke Hillel esta aki ?"
Ay de saver ke Hillel, era Nassi, un shef relijyozo i par konsekuensa, no era del todo derecho de interpelarlo de esta manera. Portanto, el doktor, no se ofendyo de esta insolensya, (terbiyesizlik),i koryo avrir la puerta.
"Tengo una pregunta urdjente a demandarte "
"Asenta," respondyo Hillel. "Dime lo ke keres saver."
"Kero saver porke los Babilonyanos tyenen kavesas redondas!."
"Una pregunta enteresante," repliko el savyo. "Sin dubyo, las komadres de Babilonya no saven enfashar los krios komo se deve."
El ombre se alesho sin afilu rengrasyar el Rabino, ke de vista kontinuo a vestirse. Ma, apenas aviya pasado doz puntos, ke de muevo batyeron a su puerta. Avyo kon kalmo i se topo delantre la mezma persona, ke le disho tener otra una pregunta, no menos importante.
"Eksplikame deke los ke biven serka el dezyerto tyenen la vista deteryorada."
"Es porke biven en una rejyon arenoza. Kontinualmente, el ayre les embiya la arena en los ojos. I, esto, les gasta la vista."
El estranyero, de muevo, sin un byervo de rengrasyamyento, partyo, travando la puerta kon brutalidad. El Nassi, kijo eskapar sus aparejos, ma, no pudo. Por la tresera vez, la puerta fue batida brutalmente. El doktor ,kon su kalmo abitual, la avyo. La mezma persona entro kon una grande insolensya, sin afilu ser kombidado, i de vista demando:
"Dime porke los Afrikanos tyenen las plantas del pye este karar de yanas?"
"El dezeo tuyo de embezarte, reelmente merese alavasyon." Repliko el Rabino."Es porke estas personas tyenen la manya de kaminar pye deskalso." El estranyero, vyendo ke Hillel estava dayinda kalmo no topava kualo dezir para ensanyarlo.
"Tengo munchas otras preguntas," disho kon birra."Deves darme las repuestas."
El savyo no pyedro su kalmo, i le respondyo ke podiya demandar todo modo de kestyon. A kualo el otro repliko:"Antes de todo ,kero saver si reelmente sos Hillel El Nassi."
"Si, mi amigo, yo so Hillel."
"Bueno,"disho kon despasensya el ombre. Si tu sos Hillel, sueto ke no ayga munchas personas komo ti en Israel."
"Porke?" demando Hillel, kon su kalmo abitual. Seriya ke sin kererlo, te ize algun danyo?"
"Si,ya me izites. Yo aviya eskometido ke te iva azerte inyervar,ma no reushi i pyedri."
Hillel, no podyendo impedirse de reir, respondyo: " No es mijor ke tu pyedras, al lugar ke yo pyedra en
irritandome, lo ke es un grande pekado?"
TOMADO DEL TALMUD
(Contes et lejendes d’Israel de A. WEİL)
