Komo lo meldamos en las gazetas, oy en dia mas de la mitad de los vyejos moradores estan mankos, syertos malorozamente muertos, otros sin kaza ni morada, esparzidos ken ande un ermano o un paryente serkano ken ande un amigo, los unos en Hudson o Atlanta los otros mas leshos...
Kedaron los mas mizeravles porke sin remedyo de fuir i tambyen los ke no pudyeron espartirsen de esta tyerra amarga ma empapushada de muzika ande eyos nasyeron, destino implakavle echo en mizmo tyempo de yorro i de riza, de afrisyon i de Jazz, vyejo kompanyero de kamino apegado a sus kuero.
La fortaleza de los elementos atmosferikos komo una maldisyon de los syelos derroko todo... nombrozos muertos, desbarakamyento para los ke pudyeron kedar en vida... indiferensya de la parte de las otoridades, mizerya, ambrera... egzodyo dolorozo... i aktualmente aunke la sivdad esta ainda medya derrokada, las yagas ainda medyas avyertas, se syente en el ayre los echos de las rizas del 150en karnaval.
La fyesta kaji immedyatamente detras de la desgrasya, detras de "Katerina", a unos kuantos metros o kilometros del amontonamyento de vyejas tavlas, una sivdad dedikada al Jazz ande mujeres komo ombres ainda kantan i baylan, envezes artos envezes ambyertos, sin pensar lo ke van a ser los dias sigyentes.
Envezes en las kayes dezyertas ajenos venidos de lesho, komo lovos vorazes, insasyavles en sus ardor salvaje de ganansya. Es ke la sivdad va ser refraguada ? es ke eya va trokar de fizyonomia? Es ke la kolor del kuero va trokar? Ke va ser de los desmazalados sin techo, pedridos en un ambiente muevo sin sus serkanos i sin sus rekordos, sin al torno de eyos las olas de esta muzika ke es para eyos la suya?
Syertas personas no mankan de dizir ke "organizar este karnaval"era un akto irrasyonal, absurdo, puedeser mizmo indesente... tener el koraje de riir en un dezyerto de ruinas, kon ainda en las orejas los gritos de dezespero.
Por seguro tyenen razon... portanto "reanimar el esprito del karnaval, vyejo de 150 anyos, kon su tradisyonalizmo i en mizmo tyempo sus manifestasyones ke mos pueden pareser vanas"es tambyen azer arrebivir una sivdad enterrada en su dolor, darle djustamente alma en asegurando la perenidad de uno de sus simbolos los mas karakteristikos... un akto de koraje.
Syempre este kotrasto entre los diferentes elementos de una mizma koza.
De una parte la riza de la otra el yorro... lado kon lado " el ayudo dezenteresado de los unos" i "la kovdisya feroz de los otros"... facha kon facha "la solidaridad" i "la indiferensya"... i en kada korason: el dolyo mesklado al menester kaji imperativo de ir mas leshos ke la dolor.
Es puede ser esto la superyoridad del ombre sovre el mundo animal o mineral... la lucha kontra el destino, komo una voluntad dezesperada de no desharse enteramente abatir.
