Syen i kuarenta i sej de las kinyentas lavorantes de la dicha fabrika muryeron de vista en este fuego. Munchas de entre eyas no puedyeron avrir las puertas de salida i preferaron echarsen de la ventana al lugar de kemarsen bivas bivas. Los patrones uzavan echar kavenado a las puertas de salida afin ke las lavorantes no roven.
‘The Ladies’ Garment Workers’ Unions" (LGWU) ke es un sendikato de lavorantes de produktos de ornamento, organizo un miting kontra las kondisyones perikolozas de lavoro de las mujeres. Investigasyones kontra los patrones kontinuo un sierto tyempo i a la fin las lavorantes pudyeron ovligar los patrones de pagar un sierto montante de idemnizasyon a la famiya de kada viktima.
Este insidento tuvo una influensia sovre la lejislasyon de lavoro en Los Etados Unidos. Duspues de un kombate largo i difisil, el sendikato (LGWU), reusho a obtener mijor kondisyones por las lavorantes. Ansi, este grande dezastre fue el empesijo de la organizasyon para estableser un diya para las mujere en el mundo entero.
En los anyos 1960, duspues del segundo movimiento de mujeres, muevas leyes konsernando sus statuto ekonomiko fueron akseptadas en siertos payises. Algunas de estas leyes son leyes prohibitando la diskriminasyon i la violensia kontra las mujeres; otras dando igualas posibilitades de edukasyon, de echo i de konje pagado para las paridas ansi ke diritos por las mujeres kazadas.
Las mujeres djudiyas djugaron un grande rolo en movimientos semejantes. Las aktivistas, las profesyonelas, las artistas, las ekrivanas, las intlektuales djudias lavoraron muncho para azer adelantar la pozisyon de las mujeres en el mundo entero. Eyas tuvieron una grande kontribusyon en el movimiento de los anyos 1960. En mezmo tiempo, eyas gerreyaron para azer adelantar las kondisyones de las mujeres en las komunitas djudiyas. Rachel Adler es una de entre eyas, eya lucho para azer evoluar el estatuto de la mujer en la tradisyon djudiya.
La karga de la mujer djudiya es mas pezgada ke la de las otras porke eya es obligada de gerreyar kon las limitasyones tradisyoneles del djudaizmo. El mas grande problema de la mujer djudia es el problema del Get .
Malorozamente las mujeres respektadas del movimiento enkontraron un otro grande problema:" el antisemitizmo". El antisemitizmo mezmo en sus grupos las izo alesharsen de sus butos. Ma syertas de entre eyas no se esvacheyaron de gerreyar i kontinuaron a lavorar para obtener diferentes derechos i tambien lucharon kontra el antisemitizmo afin ke el mundo se konsienta de la dezgrasya de este problema .
En el livro ‘Scapegoat’de Andrea Dworkin puedej topar estas linyas: ‘Las mujeres i los djudyos fueron ‘scapegoats’ (kavretas de pekados) en todas las epokas de la istorya. En la Enkizisyon, las mujeres fueron akuzadas por ser majisyanas i los djudyos por ser ateistos. En el tyempo de los Nazis, los djudyos i lo mas de las mujeres fueron las viktimas de sus violensia. Eyos atakaron el puerpo de las mujeres sin tener dingun respekto a sus eguardo.
En los anyos 1980, el treser movimiento de mujeres se realizo. Esta vez eyas gerreyaron kon diversos problemas: "obtener el dirito de tener reprezantantes en la politika i en el governo", "suprimir las limitasyones en sus kariyeras" i lo mas importante " ganar el dirito de azersen kurtaj". La djudiya feminista Gloria Steimem fue la mas grande protektora de este dirito.
Rose Shneiderman, Emma Goldman, Betty Friedar, Hannah Arendt, Gloria Steinem, Rachel Adler, Andrea Dworkin son unas kuantas de estas aktivistas.
Oy las mujeres djudiyas reusheron en munchos ramos i alkansaron los ombres.
Eyas son akademisyenas, politikas, astronotas i loreatas del premio Nobel.
El lavoro de las mujeres djudiyas en la Diaspora no se eskapo; eyas estan kontinuando a penar para adaptarsen a las kondisyones de los payizes ande biven, ma sus mas grande gerra es kontra la asimilasyon. La mujer djudiya esta gerreyando para prezervar la identitad djudiya de sus ıjos i de su famiya.
