Klara PERAHYAAyer fyestimos "Purim" ...ainda no es reelmente la primavera ma sovre los trotuares "flores de kolores a kolores" ke kaji nunka no mankan en muestra ermoza sivdad i tambyen en los arvoles la aparisyon ezitante de las primeras ojas, primeros premisyos de enfloresimyento, manyanas i tadradas mas klaras. Ansi (malgrado las nuves ainda pretas) la sertitud ke los dias a venir seran luminozos .
Coya DELEVİ
Asegun el kuento de los mezes, ADAR, es el sejen (6) despues la kreasyon del mundo, a partir de ROSHASHANA, (mez de Tishri). En konsiderandolo a partir de la salida de Misraim, es el dodjen (12) empesando de NISAN. El nombre Adar, komo la majorita de los mezes Ebreos, tyene un orijen Babilonyano, sinyifikando -GRANERO- En este mez se aparejan los kampos para la sembradura. Syendo el ultimo mez del invyerno, tyene otruna sinyifikasyon komo –ennuvlado i eskuro-.
I, aki una sitasyon: "En ADAR, espesyalmente en Yerushalayim, se enkasava los shekalim para el Sanktuaryo, kon el buto de merkar ofrendas publikas, i los menesteres kolektivos. Tambyen en Adar, se reparava los kaminos, las kayes, las fuentes ke se aviyan danyado a kavza de las luvyas del invyerno, afin de desharlos prontos para la venida de los Pelegrinos de PESAH."
-Kuando vyene ADAR, puja la alegriya- En este mez se kumplieron munchas maraviyas para el puevlo Djudio. El mirakolo de PURIM, ke estamos fyestando kon alegriya, es uno de estos…En el 13 de Adar es el TAANIT ESTER, komo es eskrito: "Anda i arrekoje a todos los Djudios ke estan en SHUSHAN, i azed taanit vozotros por mi. Yo i mis donzeyas, azeremos taanit de mizmo (Ester: 4:16) En el 14 i 15 de Adar selebramos la fyesta de PURIM.
En el oroskopo, el sinyo zodyako de este mez, es el "Peshe", (Balık ) 20 Febrero - 20 Marso sinyo de abondansa. El sinyo tyene un nombre al plural, (çoğul) –PISCIS- Aki, keridos lektores, kero transmeter un komento ke tengo meldado a este sujeto: "Los doz peshkados del sinyo zodyako, es una aluzyon (ima) a los doz mezes de ADAR i VEADAR, ke vyenen en un anyo Emboliko del kalendaryo Ebraiko".
Frankamente, yo tengo sospechos (şüphe) sovre este komento. No es ke esto pretendyendo saveduriya, ma, esto pensando kon lojika. Los sinyos del zodyak son internasyonal, todos los puevlos i nasyones los konosen. Bueno, el anyo EMBOLİKO es solo (si no me yerro) en el kalendaryo Ebraiko. Esto pronta a achetar mi inyorensa sovre el sujeto, si avra ken me va aklarar.
Naturalmente, de syempre supe la egzistensya del ADAR BET, o, komo lo konosemos:Veadar. Me lo ekspliko mi avuelo en mi chikez, i mi padre mas despues. Meneyi la kavesa en dizyendo:"ya entendi!"…Ma, en realidad, no aviya entendido NADA!!! Al pareser estava muy komplikado para mi. Ma, agora, mas o menos, ya konosko la sinyifikasyon del Anyo Emboliko, i del byervo "Shneiadarim" ke kere dezir "doble Adar", i va provar de eksplikarlo.
Bazikamente, el kalendaryo Ebraiko es lunar, i atado al torno de la luna en el derredor de la Tyerra (dünya). Este torno se kompleta kaji en 29,5 diyas ,lo ke aze 354 diyas en 12 mezes (de 11 a 12 diyas mankos ke el kalendaryo solar). 29,5x12=354. Por dar un egzempyo, en el anyo 5766 ke estamos bivyendo aktualmente, ay 6 mezes de 29, i 6 mezes de 30 diyas, lo ke aze 354. Oganyo (bu yıl) no tenemos Veadar.
Para pueder adaptar el anyo lunar a el anyo solar, los Hahamim (savyos), al presipyo (önceleri) adjustavan peryodikamente, un sigundo mez de ADAR. El fondamyento (amaç, temel) de esto era de azer kayer la fyesta de PESAH, en la Primavera, ansi ke las otras fyestas Djudias en sus sezones konvenavles. Despues, este "dekalaje" se estableso definitivamente,en UN SİKLO (dönem) KE SE RENOVELA (yenilenmek) EN KADA 19 ANYOS.En el korso de estos 19 anyos, se interkalo (yerleştirmek) 7 VEZES, un 13en mez adisyonal (ilave), ke es el VEADAR.
De esta manera, los 19 anyos korresponden (eşit olmak) a los 228 mezes del anyo SOLAR. 19x12=228. El dekalaje esta establesido de la manera siguiente, en el entervalo de 19 anyos, los EMBOLIKOS syendo en paranteza: 1DŽ-(3)džLJ-(6)lj-(8)Njᆞ-(11)ᆠ- 13-(14)ᆣᆤ-(17)ᆦ-(19). En el anyo Emboliko, la fyesta de PURIM kaye en VEADAR, de manera a konservar el mez ke la separa de la fyesta de PESAH.
En preparando este teksto, otruna vez setifiki (doğrulamak) ke ambezar es bueno i profitavle. Ma, transmeter las konosensyas, es un poko mas difisil, i komporta syertas responsabilitas: no azer yerros en la mezura del posivle. Espero ke no ize munchos.
Coya Delevi 14-ADAR
P-S-Esto regretando de no konoser en este momento, en ke lugar del korso de los 19 anyos mos topamos oganyo. C.D.
