(segun la Prensa Israelyana i la Franseza)
Klara PERAHYA
Oy Martes demanyana, 27 Marso 2006, una orasyon suve de mi korason de madre djudia:
"Ke sus ijos eskojan el partido ke los yevara verso una paz djusta i un avenir de seguridad, sin prejuisyos ni oportunizmo. Ke las armas kon laskualas eyos lucharan no seyan mas mortal, ma echas de lavoro i de ayudo en komun."
Ya ay unas kuantas semanas ke la prensa Israelyana i tambyen la Evropea konsideran el Partido "Kadima" fundado por Ariel Sharon poko antes de su maldicho desrepozo, komo el ganyante de las eleksyones lejislativas Israelyanas.
Segun el ultimo sondeo prezentado al publiko alhad la noche por la televizyon Channel 10, "Kadima" va venser kon 36 deputados sovre 120, kuando el "Partido Travayisto" de Amir Perez obtyendra solo 18 i el "Likud" de Benyamin Netanyahou 14.
Por kontra 22% de elektores Israelyanos estavan ainda indesizos.
Syempre segun lo ke meldi en la prensa Franseza:
"Aunke menos karismatiko ke Sharon, el kapo aktual de "Kadima" es un ombre de estado eksperimentado, su adelantamyento en la karrera politika fue regolar sin el mas chiko insidente politiko.
Desde la maldicha emorajia serebral de Ariel Sharon , Ehoud Olmert okupa el posto de Vice- Primer ministro responsavle . En las sedutas del Konsilyo Ministrial, un fotolyo vazio a su lado,komo un ultimo omenaje a la prezensya okulta del ke en Israel es ainda nombrado "Arik" (el Leon).
Ehoud Olmert es un ombre korajozo, duro enverso los ekstremistos de kualkyer orijen ...Desde agora, el ya esta aparejando sus kompatriotos a azer muevas konsesyones territoryales.
"El save dirijir los Echos del Governo kon diplomasia i en mizmo tyempo kon firmeza" dize el politologo Yossi en la Gazeta Haaretz.
Los ke sigyeron desde lungos anyos su enkaminamyento en el kampo de la politika , afirman ke Ehoud Olmert (aunke no fue nunka muy popular asta agora) es el ombre ke puedra konduzir el "Partido Sentristo" a la viktorya.
Avokato, aedado de 60 anyos, el tyene un grande pasado de parlamentaryo, el fue governador de Yerushalayim despues de Teddy Kollek , ministro i enfin kolavorador muy serkano i eredador espiritual de Ariel Sharon.
Seheludo, muy duro enverso sus adversaryos , Ehoud Olmert bive komo kualkyer sitizano Israelyano.
El adora asistir a los maches de su ekipo de football nombrado el "Beitar", i tambyen le plaze fumar sigaros de kualidad i vestir kostumes elegantes.
Ay de esto un syerto tyempo, el era en politika "un falkon", partizano de un grande Israel, ma aktualmente, el troko radikalmente de opinyon i konsidera en este momento ke Israel deve travarse de la mas parte de los territoryos aneksados durante la gerra de 1967.
"Ehoud Olmert es un pragmatiko i es muy muy intelijente" afirma David Kimche prezidente del Konsilyo des los Echos eksteryores.
A 28 anyos ya era myembro del Parlamente i ansi el deputado el mas mansevo ke tuvo asta agora la Knesset
En 2003, kuando Ariel Sharon fue reelijido a la kavesa del Governo Israelyano, el yamo a su lado Ehoud Olmert ke devino su vice primer ministro i su konfidente
El rolo de Olmert fue grande en la desizyon de Sharon de travarse de Gaza.
En una interviu echa en 2003 por un gazetero del jornal "Yediot Ahronot" Ehoud Olmert deklaro ke si Israel no se retira, la populasyon Judia sera trespasada i undida en la populasyon Araba de mas a mas numeroza.
La Gazeta konklue ke en kavzo (muy probavle) ande Ehoud Olmert sera elijido, su mas grande defio sera de kontinuar syempre a pensar en esta lojika.
